Búgin QR Parlamenti Májilisiniń jalpy otyrysynda depýtattar «Qazaqfilm» kinostýdiiasyn jekeshelendirýge qarsy shyqty, dep habarlaidy "Ult aqparat" Baq.kz agenttigine silteme jasap.
Otyrysta depýtattar QR premer-ministri Baqytjan Saǵyntaevqa saýal joldady. Depýtat Qýanysh Sultanov májilismender Mamraev, Qaraǵusova, Aronova, Erman, Ótemisov atynan atalǵan saýaldy oqyp berdi.
«Almatynyń eń kórikti jerleriniń birinde ornalasqan qazaq kino óneriniń qalaýshylarynyń biri - Sháken Aimanov atyndaǵy «Qazaqfilm» kinostýdiiasynyń kesheni jekeshelendiriletin nysandardyń tizimine engizildi. Kezinde kóptegen kitaphana men mádeniet úii, kitap dúkeni jáne taǵy basqa áleýmettik nysan bastapqy maqsattarynan ózgertilip, orasan áleýmettik zardap shegip, ekonomika túzelgennen keiin sol tegin ketken áleýmettik nysandardy memlekettiń qyrǵyn qarjysyna qaita satyp alǵan edik. Osy jaǵdaidy esten shyǵarmaǵanymyz abzal bolar edi», - dedi Qýanysh Sultanov.
Osy oraida ol atalǵan kinostýdiianyń mańyzdylyǵyna toqtalyp, atalǵan nysandy nelikten jekeshelendirýge bolmaitynyn túsindirdi.
«Qazaqfilm» kesheni bizdiń ultymyzdyń, rýhaniiatymyzdyń daryndy óner sheberleriniń tarihymyzǵa altyn árippen jazylǵan uly esimderimen bailanysty. «Qazaqfilm» kesheniniń ózi - qasietti shańyraq. Onyń kinostýdiiasyn satyp alatyn adam kinoóndirispen shuǵyldanbaityny beseneden belgili. Óitkeni, ol taiaý arada kommertsiialyq paida bere almaidy. Áigili «Gollivýdtyń», tipti bizge jaqyn «Mosfilmniń» dárejesine jetýge jyldar men qyrýar qarjy kerek. Sirá, onyń turǵan jeri men ǵimarattary qyzyqtyryp tursa kerek. Al sheteldikterdiń qolyna tise onda sóz joq, biz ulttyq kinodan, osy salada Elbasy maqalasynda aitylǵan ulttyq kod, tegimizdi nasihattaý múmkindiginen aiyrylamyz», - deidi ol.
Sonymen qatar depýtat atalǵan kinostýdiiany satyp alǵan azamat óz ideologiiasyn júrgizetinin de málim etti.
«Stýdiiany satyp alǵan qojaiyn óziniń ideologiiasyn júrgizedi. Ol bizdiń jas órken talanttarymyzdy óz múddesine orai paidalanýy múmkin. Osy jaǵdaidy eskere otyryp, «Qazaqfilm» kinostýdiiasyn jekeshelendirý tiziminen shyǵarý múmkindigin qarastyrýdy ótinemiz. Zań boiynsha jaýap kútemiz», - dedi Qýanysh Sultanov.
