Parlament Májilisiniń jalpy otyrysynda depýtat Albert Raý benzinniń qymbattaýyna qatysty tekserý júrgizýdi surady, dep habarlaidy "Ult aqparat".
«Bizdiń depýtattyq saýal sońǵy ýaqytta janar-jaǵarmai naryǵynda benzin baǵasynyń ósimine bailanysty bolyp otyr. Jyl basynan beri AI-92 markaly benzininiń quny Almatyda litrine 150 teńgeden 168 teńgege deiin joǵarylady, al Nur-Sultanda - 170 teńgege deiin, Aqtaýda – 172 teńgege deiin, Atyraýda 200 teńgege deiin jetti. Eger buǵan deiin quzyrly vedomstvo mundai baǵa qubylmalyǵyn importqa táýeldilik, munai óńdeý zaýytyndaǵy josparly jóndeýmen túsindirse, endi osy joly sebepti Atyraý munai óńdeý zaýytyndaǵy tehnologiialyq qondyrǵylardyń apattyq toqtaýymen bailanystyryp otyr. Óndiristik kemshilikterge «obektivti sebepterdi» tabýǵa bolatyny belgili. Degenmen, budan avtokólik júrgizýshileri zardap shekpeýi tiis dep sanaimyz», - dedi Raý Úkimet basshysynyń orynbasary Roman Skliardyń atyna joldaǵan saýalynda.
Osy oraida ol benzin baǵasynyń ósýi tarifterdiń, taýarlar men qyzmetterdiń sońǵy qunyna yqpal etetinin eske saldy. Munyń saldarynan qarapaiym tutynýshylar zardap shegedi.
«Benzin baǵasynyń ósimine qatysty jańalyqtar taraǵannan keiin, Energetika ministrligi taratqan aqparatta janar-jaǵarmai baǵasyna vedomstvo jaýapty emestigi atalyp ótken. Habarlamada qazirgi kezde munai ónimderiniń ishki naryǵyndaǵy baǵa rettelmeitindigi jáne naryqpen suranys ári usynys negizinde aiqyndalatyny jariialanǵan. Tutynýshy úshin sońǵy baǵa munai óniminiń kóterme qunynyń, janar-jaǵarmai quiý stantsiiasyna deiingi barlyq kólik shyǵyny, munai bazasynda saqtaý, bólshek satýshynyń shyǵyny, sondai-aq aktsizder men salyq negizinde qalyptasatyndyǵy jazylǵan. Quzyrly vedomstvonyń osyndai oǵash ustanymy olarda benzin baǵasynyń ósimine áreket etýde túsinikti strategiia men tiisti is-sharalardyń joqtyǵyn baiqatyp otyr», - dedi Raý.
Bul turǵyda depýtat Úkimetke tiisti usynystardy jariialady:
1) janar-jaǵarmai naryǵynda jaǵdaidy turaqtandyrý boiynsha qajetti sharalardy qabyldaý:
2) benzin baǵasyn retteýdiń tiimdi tetikterin daiarlap, engizý;
3) Básekelestikti qorǵaý jáne damytý agenttigimen birlese janar-jaǵarmai naryǵynda baǵa boiynsha kelisý men karteldik kelisim yqtimaldyǵyna tekserý júrgizý.
