Ortalyq sailaý komissiiasy Májilis depýtaty Amanjan Jamalovqa qatysty tekseristiń qorytyndysy boiynsha sheshim shyǵardy, - dep habarlaidy "Ult aqparat" vedomstvo baspasóz qyzmetine silteme jasap.
Eske salaiyq, 18 qańtarda QR Ortalyq sailaý komissiiasynyń otyrysynda 17 qańtarda 365info.kz internet-portalynda jariialanǵan "Tabysty" depýtat Jamalov Qazaqstan Parlamentinen ketýi múmkin" maqalasynda baiandalǵan faktiler boiynsha tekserý taǵaiyndalǵan bolatyn.
Portal materialynda Jamalovtyń eki JShS quryltaishysy ekeni jáne Jamalovtyń Konstitýtsiialyq zań boiynsha bul úshin májilismenniń bosatylýy kerek ekeni habarlanǵan.
"Komissiia músheleri tekserýdi tolyq kólemde júzege asyrdy. Birinshi derekkózderden alynǵan aqparat depýtat A.M. Jamalovtyń óz múlkin senimgerlik basqarýǵa berýge qatysty zańnamada belgilengen is-qimyldardy ýaqtyly jáne zańnamaǵa sáikes júrgizgenin rastady", - delingen habarlamada.
Osylaisha, usynylǵan rastaýshy qujattarǵa jáne qazaqstandyq zańnamanyń kásipkerlik jáne depýtattyq qyzmettiń úilespeýshiligi týraly normalaryna súiene otyryp, Ortsailaýkom Qazaqstan Respýblikasy Parlamenti Májilisiniń depýtaty Amanjan Jamalovtyń QR Konstitýtsiiasynyń 52-baby 3-tarmaǵynyń talaptaryn buzbaǵan degen qorytyndyǵa keldi.
Osylai dei kele, OSK ókilderi Konstitýtsiianyń 52-baby depýtattyń kásipkerlik qyzmetti júzege asyrýyna tyiym salatynyn eske saldy. Osy talapty buzǵan jaǵdaida, depýtatqa jazalaý sharalaryn qoldanýmen bailanysty máselelerdi daiyndaý QR Ortalyq sailaý komissiiasyna júkteledi.
Eske salaiyq, Májilis depýtaty HQKO-da kóz jumǵan er adam jaily "Ol úiinde de qaitys bolýy múmkin edi" degen pikirinen keiin áleýmettik jelilerde qyzý talqylana bastaǵan edi. Osydan soń "Men adamnyń kez kelgen jerde qaitys bolýy múmkin ekenin aitqym keldi, al meni joq jerden jalmaýyzǵa ainaldyrdy", - degen ol sońynda marqumnyń týystarynan keshirim suraǵan bolatyn.
