Májilis depýtaty Amanjan Jamalov zeinetaqy jinaǵyn paidalanýǵa múmkindik beretin jetkilikti shekti tómendetýdi usyndy, dep habarlaidy Sputnik Qazaqstan.
Ol 2020 jyly Prezident zeinetaqy jinaǵynyń bir bóligin alýǵa ruqsat bergenin eske saldy. Aitýynsha, 1,3 millionnan asa qazaqstandyq osy múmkindikti paidalanǵan. Azamattardyń arnaiy shotyna 3,2 trillion teńge aýdarylǵan.
"Qazirgi infliatsiia men BZJQ-nyń kiristiligi teris ekenin eskersek, sol ýaqytta zeinetaqy jinaǵyn paidalanyp úlgergen adamdar Qasym-Jomart Kemelulyna osy sheshimi úshin riza shyǵar dep oilaimyn. Olar bul aqshaǵa páter satyp aldy, qazir ol baspananyń quny da ósti. Densaýlyǵyn jaqsartty jáne taǵysyn taǵy. Alaida jetkilikti shektiń mólsheri kóterilgennen keiin, álemde balamasy joq bul bastamanyń máni joǵalyp ketti", - dedi Jamalov.
Onyń sózinshe, basqa elder Qazaqstannyń tájiribesin muqiiat zerttep, tipti qoldanyp jatyr degen aqparat ta bar.
"Osyǵan bailanysty Úkimet zeinetaqy jinaǵyn paidalanýdyń jetkilikti shegin tómendetý týraly máseleni qaita qaraýy qajet dep sanaimyn", - dedi Jamalov Premer-ministr men Qarjy naryǵyn retteý jáne damytý agenttiginiń tóraǵasyna joldaǵan depýtattyq saýalynda.
Sonymen qatar, ol qazaqstandyqtarǵa infliatsiiadan asatyn investitsiialyq tabystyń bir bóligin paidalaný múmkindigin berý qajet dep esepteidi.
Eske salsaq, biyl 1 sáýirden bastap zeinetaqy jinaǵynyń jetkilikti shegi kúrt ósti. Eger byltyr 35 jastaǵy azamattar úshin shekti kórsetkish 2 940 000 teńge bolsa, 2022 jyly ol 5 060 000 teńgeni qurap otyr.
Aita keteri, zeinetaqy jinaǵynyń bir bóligin merziminen buryn alǵysy keletin azamattyń shottaǵy qarjysy eń tómengi jetkilikti shekten asýy kerek. Shekti mejeden asqan aqshanyń barlyǵyn emdelýge nemese turǵyn úi jaǵdaiyn jaqsartýǵa (mysaly, páter satyp alý nemese úi salý) jumsaýǵa bolady.
Ár jastyń óz shegi bar. Eń tómengi jetkilikti shektiń mólsheri jyl saiyn qaita eseptelip otyrady.
