Májilis depýtaty Omarhan Óksikbaev densaýlyq saqtaý ministrligine bólinip jatqan qomaqty qarajatty tiimdi igerýdiń ýaqyty kelgenin aitty, dep habarlaidy Sputnik Qazaqstan tilshisi.
"Qurmetti Eljan Amantaiuly (densaýlyq saqtaý ministri), siz kelgeli bizdiń densaýlyq saqtaý salasyna qarjy ministrligi aqshany aiamai berip jatyr. Osy sońǵy úsh jyldyń ishinde respýblikalyq biýdjetten bir trillionnan astam qarajat bólindi. Oǵan jergilikti biýdjetten bólinetin 500 milliard teńgeni qossaq, bul óte orasan zor qarjy", - dedi Óksikbaev májiliste meditsinalyq kómektiń sapasyn arttyrýǵa qatysty ótken úkimet saǵatynda.
Sonymen qatar, májilismenniń aitýynsha, alty ministrliktiń ózinde vedomstvolyq densaýlyq saqtaý júieleri bar. Oǵan ortasha eseppen 100 milliard teńgeden asa aqsha baǵyttalyp otyr.
"Sonda halyqtyń salyǵynan túsip otyrǵan eki trillionǵa jýyq aqsha densaýlyq saqtaý salasyna jumsalyp otyr. Al endi, jańa kezde áriptesterim óz elimizde emes, shetelde baryp emdeletinder kóbeidi dep aitty. Menińshe, osy qarajattyń barlyǵyn durys jolǵa qoiatyn kez kelgen siiaqty", - dedi depýtat.
Densaýlyq saqtaý ministri Eljan Birtanov shyǵystar jyl saiyn kóbeiip kele jatqanyn moiyndady.
"Ony moiyndaimyz, biraq, shyndyǵyna kelsek, adam basyna shaqqanda siz aitqan trilliondar 60 myń teńge ǵana bolyp shyǵady. Ol kóp bolsa, 200 dollar. Al, máselen, eń damyǵan memleketterde tómengi shyǵystar myń dollardan bastalady", - dedi ministr depýtattyń suraǵyna bergen jaýabynda.
Birtanov sońǵy bir-eki jyldyń ishinde onkologiiaǵa bólinetin qarajat 30 milliardtan 40 milliard teńgege deiin ulǵaiǵanyn atap ótti.
"Biraq búgin tarifterdi qaitadan sanap shyqqanda, bizge jalpy onkologiiaǵa 70 milliard teńge qajet. Byltyr biz Prezidentke tegin meditsinalyq kólemde 360 milliard teńge tapshylyq bar ekenin aitqan edik. Sol defitsitti qazir ishki resýrstardan qarastyryp, joiyp jatyrmyz. Ekinshi jaǵynan, áleýmettik meditsinalyq saqtandyrý arqyly sheshýdi josparlap otyrmyz", - dedi vedomstvo basshysy.
