Búgin parlamentte muǵalim mamandyǵynyń mártebesin kóterý máselesi talqylandy, dep jazady sputniknews.kz.
Muǵalimderdiń jalaqysy ortasha eńbekaqydan eki esedei tómen, deidi májilis depýtaty Natalia Jumadildaeva.
"Muǵalim mamandyǵynyń mártebesi máselesi Qazaqstan úshin de asa mańyzdy. Qazaqstanda pedagogtardyń jalaqysy el boiynsha ortasha eńbekaqydan eki ese derlik tómen. 2017 jyldyń ekinshi toqsanyndaǵy statistikalyq kórsetkishterdi mysalǵa keltireiin. Pedagogtyń ortasha eńbekaqysy — 99 myń teńge, al eldegi ortasha jalaqy — 140 265 teńge", — dedi depýtat muǵalim mamandyǵynyń bedelin arttyrý máseleleri talqylanǵan otyrysta.
Depýtat tómen jalaqy bul salaǵa daryndy jastardy tartýǵa múmkindik bermei otyrǵanyn alǵa tartty.
"Altyn belgi" iegerleriniń tek 5-7 paiyzy ǵana pedagogikalyq mamandyqtardy tańdaǵan. Budan bólek, pedagogikalyq mamandyqtarǵa grantqa túsý úshin ulttyq biryńǵai testileý balynyń tómen bolýy bul kásipke qyzyǵýshylyǵy joq jastardyń kelýine sebep bolyp otyr. Desek te, kóptegen túlek diplom alǵannan keiin mamandyǵy boiynsha jumys istemeidi", — dedi depýtat.
Jumadildaeva elimizde táýelsizdik jyldary ishinde muǵalimderdiń mártebesin kóterý boiynsha jasalǵan sharýaǵa toqtalyp, biraq bul jumystardyń máseleni tolyqqandy sheshpegenin aityp ótti.
"Búgingi kúni Qazaqstanda pedagogtyń qoǵamdaǵy mártebesi týraly anyq málimet joq. Halyqaralyq deńgeide muǵalimniń mártebesin baǵalaýǵa múmkindik beretin ádis-amaldar bar. Sondai-aq bizde kadrlardyń turaqsyzdyǵyna qatysty statistika uttyq deńgeide júrgizilmeidi. Mundai málimetterdiń joqtyǵy muǵalimderdiń kásipten ketýiniń sebebi men onyń aýqymyn tolyqqandy anyqtaýǵa múmkindik bermei otyr", — dep qynjyldy depýtat.
