بٷگٸن پارلامەنتتە مۇعالٸم ماماندىعىنىڭ مەرتەبەسٸن كٶتەرۋ مەسەلەسٸ تالقىلاندى, دەپ جازادى sputniknews.kz.
مۇعالٸمدەردٸڭ جالاقىسى ورتاشا ەڭبەكاقىدان ەكٸ ەسەدەي تٶمەن, دەيدٸ مەجٸلٸس دەپۋتاتى ناتاليا جۇمادٸلداەۆا.
"مۇعالٸم ماماندىعىنىڭ مەرتەبەسٸ مەسەلەسٸ قازاقستان ٷشٸن دە اسا ماڭىزدى. قازاقستاندا پەداگوگتاردىڭ جالاقىسى ەل بويىنشا ورتاشا ەڭبەكاقىدان ەكٸ ەسە دەرلٸك تٶمەن. 2017 جىلدىڭ ەكٸنشٸ توقسانىنداعى ستاتيستيكالىق كٶرسەتكٸشتەردٸ مىسالعا كەلتٸرەيٸن. پەداگوگتىڭ ورتاشا ەڭبەكاقىسى — 99 مىڭ تەڭگە, ال ەلدەگٸ ورتاشا جالاقى — 140 265 تەڭگە", — دەدٸ دەپۋتات مۇعالٸم ماماندىعىنىڭ بەدەلٸن ارتتىرۋ مەسەلەلەرٸ تالقىلانعان وتىرىستا.
دەپۋتات تٶمەن جالاقى بۇل سالاعا دارىندى جاستاردى تارتۋعا مٷمكٸندٸك بەرمەي وتىرعانىن العا تارتتى.
"التىن بەلگٸ" يەگەرلەرٸنٸڭ تەك 5-7 پايىزى عانا پەداگوگيكالىق ماماندىقتاردى تاڭداعان. بۇدان بٶلەك, پەداگوگيكالىق ماماندىقتارعا گرانتقا تٷسۋ ٷشٸن ۇلتتىق بٸرىڭعاي تەستٸلەۋ بالىنىڭ تٶمەن بولۋى بۇل كەسٸپكە قىزىعۋشىلىعى جوق جاستاردىڭ كەلۋٸنە سەبەپ بولىپ وتىر. دەسەك تە, كٶپتەگەن تٷلەك ديپلوم العاننان كەيٸن ماماندىعى بويىنشا جۇمىس ٸستەمەيدٸ", — دەدٸ دەپۋتات.
جۇمادٸلداەۆا ەلٸمٸزدە تەۋەلسٸزدٸك جىلدارى ٸشٸندە مۇعالٸمدەردٸڭ مەرتەبەسٸن كٶتەرۋ بويىنشا جاسالعان شارۋاعا توقتالىپ, بٸراق بۇل جۇمىستاردىڭ مەسەلەنٸ تولىققاندى شەشپەگەنٸن ايتىپ ٶتتٸ.
"بٷگٸنگٸ كٷنٸ قازاقستاندا پەداگوگتىڭ قوعامداعى مەرتەبەسٸ تۋرالى انىق مەلٸمەت جوق. حالىقارالىق دەڭگەيدە مۇعالٸمنٸڭ مەرتەبەسٸن باعالاۋعا مٷمكٸندٸك بەرەتٸن ەدٸس-امالدار بار. سونداي-اق بٸزدە كادرلاردىڭ تۇراقسىزدىعىنا قاتىستى ستاتيستيكا ۇتتىق دەڭگەيدە جٷرگٸزٸلمەيدٸ. مۇنداي مەلٸمەتتەردٸڭ جوقتىعى مۇعالٸمدەردٸڭ كەسٸپتەن كەتۋٸنٸڭ سەبەبٸ مەن ونىڭ اۋقىمىن تولىققاندى انىقتاۋعا مٷمكٸندٸك بەرمەي وتىر", — دەپ قىنجىلدى دەپۋتات.
