Parlament májilisiniń depýtaty Saýytbek Ábdirahmanov parsy patshasy Kir men massagetterdiń shaiqasyna arnalǵan monýment ornatýdy usyndy. Osyǵan orai, Úkimet basshysy Asqar Maminge depýtattyq saýal joldady, dep habarlaidy "Ult aqparat".
Onyń aitýynsha, osy shaiqasty álem tarihyn ózgertken oqiǵalardyń qataryna qosýǵa bolady. Sebebi oǵan deiin aldyńǵy Aziiany, Kishi Aziiany, Midiiany, Lidiia patshalyǵy, Vaviloniiany, Mesopatamiiany, Siriiany, Palestinany jáne Finikiiany jaýlap úlgergen Kir osy joryqtan keiin Mysyrdy basyp alý soǵysyn bastap ketpekshi bolǵan. Odan keiin Eýropa elderin birinen soń birin baǵyndyrýdy kózdegen. Al Kirdiń bul joryqqa shyǵýdaǵy negizgi maqsaty saq dalasynda ańyzǵa ainalǵan mol altynǵa qol jetkizý bolatyn.
"Eger Kir massagettermen shaiqasta ajal qushpaǵanda álemniń sol zamandaǵy saiasi kartasy basqasha qalyptasýy, kóptegen halyqtyń qanquily qolbasshynyń quldyǵyna túsýi ábden múmkin edi. Eldiń azattyq jolyndaǵy osy uly erlik tól tarihymyzda tiianaqty tańbalanyp, mektep oqýlyqtaryna keńinen engizilýi kerek. Zertteýshilerdiń eńbekteri arqyly álem tilderinde nasihattalýy tiis. Uly Dalamyzda osy orasan oqiǵaǵa arnalǵan monýment turǵyzylsa da, eshqandai artyqtyǵy joq", - dedi Ábdirahmanov.
Depýtat tarih atasy atanǵan Gerodottyń jazbalaryn da eske aldy. Onda osy shaiqas jaiynda jan-jaqty jazylǵan.
"Aqyry massagetter jeńedi. Barlyq derlik parsy áskeri soǵys dalasynda qyryldy. Kirdiń ózi de óldi. Ol tolyq 29 jyl patshalyq qurǵan. Tomiris sharap quiatyn teri ydysty adam qanyna toltyryp, qyrylǵandardyń arasynan Kirdiń denesin taýyp kelýge buiryq beredi. Kirdiń óli denesin tapqanda onyń basyn ydysqa tyǵýdy buiyrady. Sodan keiin: "Men seni shaiqasta jeńip, aman qalǵanymmen sen meni jeńdiń. Sebebi ailamen balamdy qurttyń. Sondyqtan men aitqanymdai seni qanǵa toidyramyn" deidi", - dep atap ótti Ábdirahmanov.
Depýtat ol oqiǵa dúniejúzilik tarihqa kirgenin, kóptegen kórkem shyǵarmaǵa, sahnalyq týyndylarǵa arqaý bolǵanyn eske saldy. Bolat Jandarbekov "Tomiris" atty hikaiasyn jazdy. Qazaqstanda "Tomiris" atty film túsirildi.
"2020 jyly bizdiń dáýirimizge deiingi 530 jyly ótken ol shaiqasqa 2 550 jyl tolǵaly tur. Uly qolbasshy Kirdi jer qaptyrǵan shaiqastyń ótken óńirin shamamen bolsa da, anyqtaýdy maqsat etetin tiisti ǵylymi-zertteý jumystaryn júrgizý jóninde naqty tapsyrma berýińizdi suraimyz. Maman tarihshylarymyz bir toqtamǵa kelgen jaǵdaida ol mańaidaǵy magistraldik joldyń boiynda osy jerdi mekendegen batyr babalardyń ǵajaiyp erligine arnalǵan monýment qoiý máselesin biýdjet qarajatynyń aralasýynsyz-aq sheshýge bolady degen oidamyz", - dep túiindedi Ábdirahmanov.
