Májilis depýtaty Ahmet Mýradov Qordaidaǵy tragediiadan keiin áleýmettik jelilerde Qazaqstan halqy Assambleiasyn jabý kerek degen keibir qazaqstandyqtarǵa sálem joldady, dep habarlaidy Sputnik Qazaqstan.
Halqynyń basym bóligin dúngender quraityn Masanchi aýylyndaǵy qaqtyǵystan keiin qazaqstandyqtar áleýmettik jelilerde Qazaqstan halqy Assambleiasynyń jumysyn synǵa alǵan bolatyn. Jeli qoldanýshylary Assambleiany jabý kerek dep sanaidy.
Qazaqstandyqtardyń bul syny Assambleia atynan sailanǵan depýtat Ahmet Mýradovtyń ashýyn keltirdi.
"Qazaqstan halqy Assambleiasyn jabý kerek degenderge menen sálem joldańyz. Assambleiany japqysy keletin synshylardy bizge kelip, birge jumys istep, biz jasap jatqan dúnielerdi jasap kórýge shaqyramyn", - dedi ol.
Qazaqstan halqy Assambleiasy óz betimen ómir súretin qandai da bir jeke bólim emes, dep jalǵastyrdy Mýradov.
Assambleia tek jiyn-toilarmen, kontserttermen shekteledi degen synǵa qatysty depýtattyń bergen jaýaby bylai boldy.
"Túrli merekeler, festivalder men kontsertter uiymdastyryp jatatynymyz ras. Al endi basqasha biz bir-birimizdi qalai tanimyz? Biraq, ortaq mindet, ulttyq múdde, memlekettik baǵdarlamalar - bárine birdei, ortaq", - dedi ol.
Mýradov qazir Assambleia Qordaidaǵy oqiǵadan zardap shekkenderge kómek kórsetýdiń jolyn tańdap jatqanyn aitty.
