Májilistiń jalpy otyrysynda depýrat Erlan Sairov halyqqa kómir satý tizbeginde shamamen 10 - ǵa tarta býyn qalyptasqanyn aitty, dep habarlaidy QazAqparat.
«Bizdiń depýtattyq saýalymyz elimizdiń birqatar óńirlerinen kelip túsken ótinishterge bailanysty týyndady, ol aimaqtarda turmystyq kómirdiń jetispeýshiliginen shielenisti jaǵdai qalyptasqan.
Elimizde kómirdiń júieli jetispeýshiligi úshin obektivti alǵysharttar bolmasa da, el azamattarynyń moraldyq-psihologiialyq jaǵdaiyna teris áser etetin dúrlikpe júrip jatyr. Osyndai jaǵdai kómir óndirý boiynsha álemniń 10-eliniń qataryna enetin memlekette bolyp otyr», - dedi E. Sairov Premer-Ministrdiń orynbasary Roman Skliardyń atyna joldaǵan saýalynda.
Onyń aitýnysha, búgingi kúni halyqqa kómir satý tizbeginde shamamen 10 - ǵa tarta býyn qalyptasqan. Sonyń negizgileri: bul kómir óndirý razrezi, temir jolmen jóneltýge arnalǵan tieý pýnktteri, temir jol arqyly tasymaldaý, temirjol tuiyqtarynda qabyldaý terminaldary, kómirdi tutynýshylarǵa jetkizetin taratý pýnktteri.
«Osy kezeńderdiń barlyǵynda árkim óz paidasyn qymqyrýǵa tyrysady, osyǵan bailanysty baǵa qymbattai beredi. Iaǵni, kómir baǵasyn deldaldyq qurylymdar nusqap otyr. Kómirdi birjalyq saýdalaýdyń erejeleri deldal-kásiporyndarǵa kómirdi úlken kólemde satyp alýǵa jáne ony birden razrezden eki-úsh ese qymbat baǵamen satýǵa múmkindik beredi dep aitýǵa negiz bar. Satý núktelerindegi kómirdiń jetispeýshiligi kómirdi jetkizetin vagondardyń tapshylyǵyna bailanysty. Sondyqtan, kómir razrezden satý núktesine 6 kúnde emes, 16 kúnde jetkiziledi», - dedi depýtat.
Onyń sózine qaraǵanda, búginde razrezden tonnasy shamamen 7800 teńgeden satylyp jatqan kómir Almaty, Aqmola, Qyzylorda, Qostanai, Shyǵys Qazaqstan, Soltústik Qazaqstan oblystaryndaǵy saýda núktelerinde tonnasy 25-30 myń teńgeden satylýda. Osylaisha, túpki tutynýshy úshin baǵa bastapqydan úsh-tórt ese ósedi.
«Bul - aýyldaǵy aǵaiynnyń qaltasy múldem kótermeitin baǵa. Osy qyp-qyzyl baǵaǵa kómirdiń ózi tapshy. Qaqaǵan qysta azamattar aqshasyn tólep qoiyp, kómirdi tosýǵa májbúr. «Nur Otan» partiiasy Fraktsiia músheleri azamattar úshin turmystyq kómir qoljetimdi jáne ádil baǵamen satylýy tiis dep sanaimyz», - dedi E. Sairov.
Halyqqa turmystyq kómir jetkizýdiń ótkir áleýmettik mańyzdylyǵyn eskere otyryp, kelesi qadamdar qajet:
1. Aýyldyq eldi mekenderdiń turǵyndarynyń turmystyq tutynýy úshin kómirdiń normativtik qoryn qalyptastyrýdy jedel qamtamasyz etý.
2. Kómirdi satý oryndaryna tasymaldaý úshin qajetti vagon sanyn bólýge basymdyq berý.
3. Kómir baǵasyn qalyptastyrýdyń ashyqtyǵyn jáne kómirdi kóterme satyp alýshylar arasyndaǵy barynsha básekelestikti qamtamasyz etý.
4. Naryq sýbektileriniń arasyndaǵy básekelestikke qarsy kelisimderdi boldyrmaý, turmystyq kómir tutynýshylarynyń túpkilikti baǵasyn qalyptastyrýǵa deldaldyq bailanystardyń áserin boldyrmaý boiynsha jumystardy júrgizý.
