Májilis depýtaty Janat Jarasov Ekologiialyq kodeks jobasyn ekinshi oqylymǵa deiin pysyqtaý kerektigin málim etti, dep habarlaidy QazAqparat.
«Búgin qaralyp otyrǵan zań jobasy Ákimshilik zańnama boiynsha zańdylyqty qosymsha qamtamasyz etýge baǵyttalǵan. Qorshaǵan ortanyń sapasyn saqtaý men jaqsartý máselesinde de onyń mańyzy zor. Sonymen birge depýtattar Ákimshilik quqyqbuzýshylyq jónindegi kodekstiń qoldanystaǵy normalaryna sáikes keltirý úshin maqsatty túzetýler engizdi. Atap aitqanda ekologiialyq ruqsatty toqtata turý, odan aiyrý, sondai-aq qyzmetin toqtatý jáne oǵan tyiym salý túrindegi sanktsiialar kózdelgen. Qorshaǵan ortany qorǵaý salasyndaǵy quqyqbuzýshylyqtar tek sottarda qaralatyn bolady. Óitkeni bul óndiristik protsesterdi toqtatýǵa alyp keledi. Ol óz kezeginde aýyr áleýmettik-ekonomikalyq saldarǵa soqtyrýy múmkin», - dedi Janat Jarasov.
Depýtattyń aitýynsha, sondai quzyretti qorshaǵan ortany qorǵaý salasyndaǵy ýákiletti organǵa berý – sybailas jemqorlyq úshin jáne bizneske qysym kórsetý úshin qolaily jaǵdai jasaidy.
«Zań jobasyna muqiiat ári jan-jaqty qaraýdy talap etetin normalar usynylyp otyr. Atap aitqanda túzetýlerdiń birinde iri kásipkerlik sýbektisi qorshaǵan ortany qorǵaý salasynda ákimshilik quqyqbuzýshylyq jasaǵany úshin 1 jyldan 3 jylǵa deiin jazaǵa tartylǵan bolyp esepteletin merzim usynyldy. Bul normany qabyldaý emissiialardy asyrǵany úshin aiyppul mólsheriniń óte joǵary bolýymen qatar Ekologiialyq kodekstiń eń úzdik qoljetimdi tehnikalardy engizýge baǵyttalǵan negizgi ideologiialaryn iske asyrmaidy. Sebebi iri kásipkerlik sýbektileri memlekettik biýdjetke qazirgidei qarajattyń dál sondai kólemin tóleýge jáne oǵan qosa úzdik qoljetimdi tehnologiiany engizýge májbúr bolady. Osyǵan bailanysty ekinshi oqylymǵa deiin osy túzetý pysyqtaý qajet», - dedi ol.
