Májilis depýtaty Ahmed Mýradov dástúrli emes meditsina qyzmetin baqylaýǵa alýǵa shaqyrdy, dep habarlaidy Baq.kz agenttigi.
«Dástúrli emes meditsina máselesin kótergim keledi. Ol – qytai, islam, qasietti sý, shipaly balshyq. Men atalǵan ádispen «emdelgen» adamdarmen kezdestim. Bul salada eshqandai baqylaý joq. Munda aqsha ainalymy qandai deńgeide ekenin bilesizder me? Biraq (azamattar – avtor) qomaqty aqsha tólep otyr. Nátijesi de kóńilden shyqpaidy. Eshnárse nátijesin bermegen soń, azamattar kepildendirilgen meditsinalyq qyzmettiń kómegine júginedi. Múmkin, bizge jaǵdaidy ózgertý kerek shyǵar?», - dedi depýtat Májilis otyrysynda.
Sonymen qatar Ahmed Mýradov elimizde qansha emshi bar ekenin, olardyń qansha adamdy emdep jazǵanyn eshkim bilmeitinin ashyq aitty.
«Múmkin bul kommertsiialyq uiymdardy baqylap otyrǵan organdarǵa berilgen erekshe quzyret pe? Bizde qansha emshi bar? Olardyń kórsetkishteri qandai? Olar týraly statistika qaida kelip jatyr? Saittarda olar barlyq aýrýdy emdei alady dep kórsetilgen jáne qyzmet kórsetý baǵasy da óte qymbat. Alaida (emshi – avtor) Qazaqstan da ǵana emes, álemde bar», - dedi ol.
Osy oraida Ahmed Mýradov Densaýlyq saqtaý ministrligi jáne atalǵan salaǵa jaýapty organdarǵa bul máselege nazar aýdarýǵa shaqyrdy.
«Munda azamattardan «barlyǵy jaqsy bolady» dep dýa oqý arqyly aqsha alyp otyr. Ókinishke qarai, nátije joq. Resmi meditsinamen sottasýǵa bolady, biraq bularmen ( dástúrli emes meditsina ókilderimen – avtor) olai istei almaisyń. Muny zertteý kerek», - dedi depýtat.
Sonymen qatar atalǵan máselege qatysty Májilis tóraǵasy Nurlan Nyǵmatýlin de óz pikirin bildirdi.
«Meniń oiymsha, munda adamnyń ishki mádenietin de esepke alý kerek. Azamat XXI ǵasyrda atalǵan jarnamadaǵy aila-amaldardyń dáýreni ótkenin túsinýi qajet. Kezinde olar (emshiler – avtor) bútin bir stadiondy jinady. Televizor aldynda halyqtyń jarty bóligi bankini zariadtady ǵoi. Munyń barlyǵy ótti. Azamat barlyǵy turmys dástúrine bailanysty ekenin túsýiný shart», - dedi tóraǵa.
