«Ádilet» partiiasy fraktsiiasynyń depýtaty Dana Medeýova Premer-ministr Oljas Bektenov pen Densaýlyq saqtaý ministri Aqmaral Álnazarovaǵa depýtattyq joldaý jasap, meditsina qyzmetkerleriniń kásibi mártebesi men quqyqtaryn kúsheitýdi usyndy, dep habarlaidy ult.kz.
Depýtattyń aitýynsha, meditsina qyzmetkerleriniń mártebesin kóterý men kásibi bedelin arttyrý memlekettik saiasattyń basym baǵyttarynyń biri bolýy kerek.
Ol pandemiia densaýlyq saqtaý júiesiniń turaqtylyǵy meditsinalyq jabdyq pen dári-dármekke ǵana emes, eń aldymen bilikti meditsinalyq kadrlarǵa bailanysty ekenin kórsetkenin atap ótti.
«Dárigerdiń mártebesin tek áleýmettik ádilettilik aiasynda qarastyrmaýymyz kerek. Dárigerdiń mártebesi – biologiialyq jáne ulttyq qaýipsizdik máselesi», – dedi Dana Medeýova.
Depýtat meditsina salasyndaǵy birneshe máseleni atap ótti.
Birinshiden, dárigerlerdiń eńbekaqy júiesin ikemdi etý qajet. Onyń pikirinshe, jalaqy dárigerdiń biliktiligin eskerip eseptelýi kerek. Sonymen qatar meditsina qyzmetkerlerin kásibine qatysy joq biýrokratiialyq jumystardan bosatý qajet.
Ekinshiden, «dáriger» jáne «vrach» ataýlaryn zańmen qorǵaý usynyldy. Depýtat bul ataýlardyń artynda meditsinalyq bilim, rastalǵan biliktilik jáne kásibi qyzmetpen ainalysý quqyǵy turýy kerek dep sanaidy.
Úshinshiden, kadr tapshylyǵyn obektivti baǵalaý qajet. Dana Medeýova jańa mamandardy tartýmen qatar, densaýlyq saqtaý júiesinde qazir jumys istep júrgen dárigerlerdi ustap qalýǵa da jaǵdai jasaý keregin aitty.
Tórtinshiden, ulttyq qaýipsizdikke qaýip tóngen jaǵdaida dárigerlerdiń jedel ári derbes áreket etýine múmkindik bolýy kerek. Ol úshin meditsina qyzmetkerleriniń ókilettigi naqty belgilenip, kásibi sheshimderi quqyqtyq turǵydan qorǵalýy qajet.
Osy máselelerdi júieli túrde sheshý úshin depýtat «Meditsinalyq qyzmetkerlerdiń kásibi mártebesi jáne qyzmetine kepildikter týraly» zań jobasyn ázirleýdi bastamaq.
Dana Medeýova pandemiianyń basty sabaqtarynyń biri meditsinalyq kadrlardyń mańyzyn kórsetkenin aitty.
«Bilikti dárigerlerdi daiarlaýǵa on jyl kóleminde ýaqyt qajet. Al daiyn dárigerdi osal júie bir kúnniń ishinde joq qylýy múmkin», – dedi depýtat.
Onyń aitýynsha, memlekettiń mindeti – dárigerlerdiń tómen jalaqy nemese júiedegi máseleler saldarynan mamandyǵyn tastap ketpeýine jáne halyq igiligi úshin eńbek etýine jaǵdai jasaý.
