Májilis depýtaty Amanjan Jamalov zeinetaqy jinaqtarynyń bir bóligin tiisti maqsattarǵa paidalaný boiynsha zańǵa táýeldi normativtik-quqyqtyq aktilerdi qabyldaýdy tezdetýdi surady, dep habarlaidy "Ult aqparat".
Osy oraida ol 2020 jyldyń qyrkúieginde Prezident óz Joldaýynda 2021 jyldan bastap qazaqstandyqtar zeinetaqy jinaǵynyń bir bóligin turǵyn úi jaǵdaiyn jaqsartýǵa jumsai alatynyn jariialaǵanyn eske saldy. Bul rette tiisti zańǵa Memleket basshysy qol qoiyp, qujat zańdy kúshine endi.
«Alaida Úkimet tarapynan baspana jaǵdaiyn jaqsartý úshin birjolǵy zeinetaqy tólemderin paidalaný erejesi áli de qabyldanbady. 761 myń azamat osy erejeni kútip otyr. Olardyń kóbisi baspana tańdap alǵan, al bul ereje jobasy túrli kelisýler boiynsha kabinet aralap júr. Osy oraida halyq tarapynan kóptegen eskertýler túsip jatqanyn aita ketken jón», - dedi A. Jamalov QR Premer-Ministri men QR Ulttyq banki tóraǵasynyń atyna joldanǵan depýtattyq saýalynda.
Onyń aitýynsha, azamattardyń birazy baspanany 5 jyl ishinde satýǵa bolmaidy degen shekteýge narazy.
«Bul turǵyda azamattardyń qarapaiym ómirlik jaǵdailary eskerilmegen, iaǵni basqa óńirge kóshý, turǵyn úi jaǵdaiyn ary qarai jaqsartý josparlary bar ǵoi. Prezident tapsyrmasy men el halqynyń úmitin eskere otyryp, zeinetaqy jinaqtarynyń bir bóligin paidalaný boiynsha qajetti zańǵa táýeldi normativtik-quqyqtyq aktilerdi qabyldaýdy tezdetip, 2021 jylǵy qańtar aiynyń sońyna deiin olardy iske qosýdy suraimyn», - dedi A. Jamalov.
