Senator Lázzat Súleimen joǵary oqý oryndarynyń jas túlekterine arnalǵan «Diplommen aýylǵa» baǵdarlamasynyń tartymdylyǵyn arttyrý úshin ony ózgertýdi usyndy, dep habarlaidy QazAqparat.
Ol elimizdiń Premer-Ministriniń atyna joldaǵan depýtattyq saýalynda birqatar naqty sharalardy da atap kórsetti. Bul jobanyń tiimdiligine toqtalǵan senator, baǵdarlamaǵa qatysýshylardyń keiinnen aýylda turyp jatqanyn aita kele, kadr tapshylyǵy máselesi áli de ózekti bolyp otyrǵanyn alǵa tartty.
«Ornalasqan mamandar bilim salasyna, densaýlyq saqtaý salasyna tiesili. Problemalar da barshylyq. Birinshiden, mádeniet, sport, áleýmettik, agroónerkásip salalaryna ornalasqan mamandar sany óte az», - dedi senator palatanyń jalpy otyrysynda.
Sondai-aq, depýtat Ulttyq ekonomika ministrligi júrgizip jatqan tájiribeni de nazardan tys qaldyrmady. Atap aitqanda, baǵdarlamaǵa bólinetin qarjy kólemin qysqarǵanyna toqtaldy. Bul kóbinese jobaǵa qatysýshylardyń tiisti tólemdersiz qalýyna ákeledi. Máselen, ótken jyly Batys Qazaqstan oblysynda ótinish bergenderdiń 70 paiyzy ǵana turǵyn úi satyp alýǵa nesie ala alǵan bolsa, qarjy tapshylyǵy 757 million teńgeden asqan. Osy jáne basqa da birqatar júieli máselelerdi sheshý úshin senator Úkimettiń qaraýyna birqatar naqty sharalardy usyndy.
«Mamandardy yntalandyrý men jergilikti jerlerde bekitýdi aýylda ǵana emes, monoqalalarda da iske asyrý kerek. Sondai-aq búgingi ekonomikalyq jaǵdaidy eskerip, jergilikti atqarýshy organdardyń usynystaryna sáikes, kóterme járdemaqy jáne turǵyn úige beriletin biýdjettik nesie mólsherlerin ulǵaitýdy qarastyrý qajet. Óńirlerdiń qajettiligin naqty eskerip, tiisti taldaý ótkizý, qoldaý salalarynyń tizimin keńeitý, qarajat bólýdiń, paidalanýdyń ashyqtyǵyn qamtamasyz etý, kómek berý baǵyttaryn keńeitý mańyzdy», - dedi senator.
