Senat depýtattary Qazaqstan 30 jyl ishinde ulttyq ideologiia men ulttyq tárbiede úlken olqylyq jiberip alǵanyn moiyndady. Senator Nurtóre Júsiptiń aitýynsha, qazirgi urpaq ata-ananyń tyiymdarymen emes, Tik-tok arqyly tárbielenip jatyr, dep habarlaidy Sputnik Qazaqstan.
Nurtóre Júsip Premer-ministr Álihan Smaiylovqa joldaǵan depýtattyq saýalynda "Almaty tragediiasyna" ákep soqqan sebepterge toqtaldy. Aitýynsha, qazir qoǵamda "prezidentti qoldaiyq" degen pikir bar. Ol durys. Biraq, depýtattyń pikirinshe, prezidentti qur sózben emes, naqty ispen qoldaý kerek.
"Biz ulttyq ideologiia men ulttyq tárbiede úlken olqylyq jiberip aldyq. Muny ashyq moiyndaý kerek. "Meniń memleketim", "meniń Qazaqstanym" degen otansúigish sezimdi tereń ornyqtyrý ornyna, qalai da aqsha tabý, tez baiý, tirliktiń bárin aqshamen ólsheý uǵymdaryn alǵa shyǵardyq. Búgingi jastar babalardyń "ták-ták" degen tyiymdarymen emes, negizinen Tik-tok arqyly tárbielenip jatyr", - dep qapalandy Nurtóre Júsip.
Ol qoǵamda eńbek etý, adal mal tabý, Otanǵa, memleketke adaldyq, qoǵam aldyndaǵy jaýapkershilik, ádilet, ar, uiat uǵymdary keiinge ysyrylyp qalǵanyn aitty.
"Óz ordasyn ózi oirandaityn, bul áreket úshin bir sátte oilanbaityn qanipezerlik qaidan shyqty?! Ákeniń sózin balasy tyńdamaityn, qoi degendi bilmeitin, úlkenderden yqpaityn, qyńyr urpaq nege kóbeidi? Elshil, memleketshil, erteńshil tolqyn qaida? Ul-qyzǵa durys tárbie bermesek, tulǵa qalai shyǵady?", - dep alańdady senator.
Nurtóre Júsip byltyr Senatta ótken parlamenttik tyńdaýda bes qundylyq, atap aitqanda táýelsizdik pen tarihi tanym, el men jer, til men imandylyq, ulttyq dástúr men otbasylyq tárbie, bilim men biliktilik qazaq qoǵamynyń basty qaǵidattary retinde kún tártibine shyǵarylǵanyn eske saldy. Úkimetke, tiisti ministrlikterge usynymdar berilgen. Alaida, depýtattyń sózinshe, sonyń birde biri nazarǵa alynbady.
"Aitylǵan sóz aitylǵan jerde qaldy. Sizden sol parlamenttik tyńdaý materialdaryn úkimet músheleriniń bárine tanystyrýdy, solardy júzege asyrý úshin shuǵyl áreket etýdi talap etemin", - dedi Júsip Premer-ministrge.
Osy rette senator Úkimet jumysyna kóńili tolmaitynyn jetkizdi. Aitýynsha, Úkimet músheleri óz jumysyn bólek-bólek isteidi. Ár vedomstvo óz kórpesin ózine qarai tartady. Ortaq baǵyt, ortaq jospar, úilesimdi is-qimyl joq.
Sondai-aq ol teledidar men BAQ-taǵy habarlarǵa nazar aýdarýǵa shaqyrdy. Aitýynsha, Qazaqstannyń aqparat keńistigi qaptaǵan shoý men mán-maǵynasy shamaly telehabarlarǵa tolyp ketken. Barlyq telearna reiting qýý isimen ainalysady.
Nurtóre Júsip ulttyq memleket quryp jatqanda, eshqandai reitingtiń qajeti joq dep sanaidy. Bul rette depýtat "Elarna", "Tálim TV" arnalaryn jasóspirimder men jastar arnasy etip qaita qurýdy usyndy.
