Áleýmettik jelilerde Almaty turǵyndaryna shabýyl jasap, keiin elden deportatsiialanǵan jasóspirim qyzdarǵa uqsas toptyń Astanada júrgeni túsirilgen video qyzý talqylandy, dep habarlaidy ult.kz.
Videoda qoǵamdyq kólikte otyrǵan jasóspirimder beinelengen. Olardyń biri ózin videoǵa túsirip jatqanyn baiqap, jazbany óshirýdi talap etedi. Video avtory kadrdaǵy qyzdardyń buǵan deiin Almatyda qoǵamnyń narazylyǵyn týdyrǵan jasóspirimderge uqsaitynyn aitqan.
Jeli qoldanýshylary qyzdardy birden tanyǵanyn jazyp, olardyń qalaisha elge qaita kirgenine qatysty suraqtar qoidy. Pikir qaldyrýshylardyń bir bóligi quqyq qorǵaý organdarynan túsinikteme talap etti.
Alaida Almaty qalalyq politsiia departamenti taraǵan aqparatty tekserip, videodaǵy jazbanyń eski ekenin málimdedi.
«Atalǵan beinejazba boiynsha tekseris júrgizildi. Nátijesinde onyń 2024 jyly túsirilgen eski video ekeni anyqtaldy», – dep habarlady vedomstvo.
Politsiia ókilderi buǵan deiin atalǵan jasóspirimderge qatysty sot sheshimi shyqqanyn jáne sol sheshim negizinde olardyń Qazaqstan aýmaǵynan deportatsiialanǵanyn eske saldy.
Eske salsaq, ótken jyly Almatydaǵy 28 gvardiiashy-panfilovshylar saiabaǵy aýmaǵynda bir top jasóspirim qyzdyń agressivti áreketi qoǵamda úlken rezonans týdyrǵan edi. Áleýmettik jelilerde taraǵan videolarda olardyń turǵyndarǵa tiisip, zattaryn tartyp alyp, tas laqtyryp, kúsh qoldanǵany kóringen. Keiin politsiia bul qyzdardyń Tájikstan azamattary ekenin anyqtaǵan bolatyn.
