Qazaqstannyń Densaýlyq saqtaý ministri «Aqtas» respýblikalyq mamandandyrylǵan psihiatriialyq aýrýhanasyna keshendi tekserý júrgizýdi tapsyrdy, dep habarlaidy ult.kz.
Mundai sheshim buqaralyq aqparat quraldary men áleýmettik jelilerde patsientterdiń emdeý jáne ustaý jaǵdaiyna qatysty jariialanǵan shaǵymdardan keiin qabyldandy.
Ministrliktiń málimetinshe, tekserýdi Meditsinalyq jáne farmatsevtikalyq baqylaý komiteti júrgizedi. Mamandar meditsinalyq qujattamany, emdeý protsesiniń uiymdastyrylýyn, patsientterdiń aýrýhanada bolý jaǵdaiyn, laýazymdy tulǵalardyń áreketterin jáne azamattardyń quqyqtarynyń saqtalýyn zerdeleidi.
Tekserý jumysyna prokýratýra organdarynyń, Adam quqyqtary jónindegi ýákildiń ókilderi men ózge de memlekettik organdardyń qatysýy josparlanyp otyr.
Densaýlyq saqtaý ministrligi tekserý qorytyndysy boiynsha jariialanǵan barlyq derekke quqyqtyq jáne qyzmettik baǵa beriletinin málimdedi. Eger zańbuzýshylyqtar anyqtalsa, tiisti sharalar qabyldanyp, kináli tulǵalar jaýapkershilikke tartylady.
Eske salaiyq, buǵan deiin YouTube platformasynda «Aqtas» aýrýhanasynda májbúrli em qabyldap jatqan Nikolai Jumaǵalievtiń suhbaty jariialanǵan bolatyn. Ol mekemedegi turmys jaǵdaiyna qatysty pikir bildirip, jeke keńistiktiń jetkiliksizdigi, palatalarda uzaq ýaqyt bolý, serýendeýge shekteýli múmkindik jáne turmystyq qolaisyzdyqtar týraly aitqan.
Nikolai Jumaǵaliev 1970-jyldardyń sońynda birneshe adamdy óltirgeni úshin qylmystyq jaýapkershilikke tartylǵan. Tergeý derekterine sáikes, onyń qurbandarynyń sany keminde 10 adamdy quraǵan, olardyń basym bóligi áielder bolǵan. Sot ony esi durys emes dep tanyp, májbúrli emdeýge jibergen.
«Aqtas» – Qazaqstandaǵy osy baǵyttaǵy jalǵyz mamandandyrylǵan meditsinalyq mekeme. Munda sottyń sheshimimen májbúrli meditsinalyq em taǵaiyndalǵan azamattar emdeledi. Densaýlyq saqtaý ministrliginiń málimetinshe, aýrýhanadaǵy patsientterdiń 80 paiyzdan astamy adamǵa qarsy aýyr jáne asa aýyr qylmys jasaǵan.
