Qazaqstanda bosandyrý uiymdaryndaǵy sanitariialyq talaptardyń saqtalýyna júrgizilgen tekserý jumystary aiaqtalýǵa jaqyn. Densaýlyq saqtaý ministrligi 84 nysannyń 82-sin tekserdi. Onyń ishinde 35 perinataldyq ortalyq pen 47 bosandyrý bólimi bar, dep habarlaidy ult.kz.
Tekserý barysynda mamandar meditsinalyq uiymdardaǵy infektsiialyq qaýipsizdik talaptarynyń oryndalýyn baǵalady. Atap aitqanda, sterilizatsiia jáne dezinfektsiia jumystary, jeldetý men sýmen jabdyqtaý júieleriniń jaǵdaiy, infektsiialardy der kezinde anyqtaý jáne infektsiialyq baqylaý qyzmetteriniń jumysy tekserildi.
Sonymen qatar zerthanalyq zertteýler júrgizildi. Bul mamandarǵa tek qujattardy ǵana emes, meditsinalyq kómektiń is júzinde qalai kórsetilip jatqanyn baǵalaýǵa múmkindik berdi.
Tekserý nátijesinde 81 sanitariialyq nusqama berildi. 29 meditsinalyq uiymda dezinfektsiialyq-sterilizatsiialyq rejimniń buzylǵany anyqtaldy. Shuǵyl joiýdy qajet etetin kemshilikter boiynsha tiisti sharalar qabyldandy.
Densaýlyq saqtaý birinshi vitse-ministri Timýr Sultanǵaziev óńirlik densaýlyq saqtaý basqarmalaryna berilgen nusqamalardyń oryndalýyn ai saiyn baqylaýdy tapsyrdy. Sondai-aq bosandyrý uiymdarynyń sanitariialyq-tehnikalyq jaǵdaiyn belgilengen talaptarǵa sáikestendirý mindetteldi.
Budan bólek, infektsiialyq baqylaý qyzmetterin kadrlarmen qamtamasyz etýdi kúsheitý, infektsiialardyń aldyn alý baǵdarlamalaryn jańartý jáne meditsinalyq uiym basshylarynyń jeke jaýapkershiligin arttyrý tapsyryldy.
«Bizdiń mindetimiz – tek buzýshylyqty tirkep, nusqama berý emes. Bir aidan keiin biz qaita kelip, naqty nátijeni kórýimiz kerek», – dedi Timýr Sultanǵaziev.
Ministrliktiń málimetinshe, tekserý jumystarynyń kelesi kezeńinde balalar aýrýhanalary qamtylady. Keiin osyndai baqylaý meditsinalyq-sanitariialyq alǵashqy kómek uiymdarynda da júrgiziledi.
