Qazaqstandyq sarapshylar toby densaýlyq saqtaý salasyndaǵy qarajatty jumsaý sharalary qanshalyqty ashyq júzege asyrylýda degen másele tóńireginde áleýmettik zertteý júrgizgen. Bul týraly Densaýlyq saqtaý biýdjeti ashyqtyǵyna júrgizilgen monitoringi jaiynda ótken «Antikor.Live baǵdarlamasynda aityldy, dep habarlaidy QazAqparat.
Ekonomika jáne densaýlyq saqtaýdy qarjylandyrý máseleleri jónindegi sarapshy jáne konsýltant Marat Mamaev qazaqstandyq densaýlyq saqtaýdyń respýblikalyq biýdjettegi úlesi shamamen bir jarym trillion teńgeni quraitynyn aitty. Jaqynda sarapshylar toby bul qarajatty jumsaý sharalarynyń ashyqtyǵyna bailanysty áleýmettik zertteý júrgizgen.
«Jaqynda biz «ashyqtyq jáne esep berý» degen qyzyqty jobamen ainalystyq. Barlyq saitty, ashyq derekkózderdi, málimetter bazasyna sholý jasap, monitoring júrgizdik. Biz biýdjetti qalyptastyrý jáne igerý kezeńinde ashyqtyq pen esep berýshilik týraly túsinik joq ekenin, iaǵni árqashan biz qalaǵandai bola bermeitinin túsindik», - deidi Marat Mamaev.
Ol zertteý jumysy qalai júzege asqany týraly aitty.
«Biz saitqa kirip, aqsha qaida, qalai jumsalatynyn, josparlanǵan qarajattyń igerilýi qandai kólemde júzege asyp jatqanyn qaradyq. Zertteý júrgizý barysynda biz bir qyzyqty nárseni kórdik: saittarda «azamattyq biýdjet» dep atalatyn prezentatsiia bar jáne ol jerde «tegin meditsinalyq kómektiń kepildendirilgen kólemi aiasynda meditsinalyq kómek kórsetý» dep atalatyn bir ǵana sóilem men bir ǵana san jazylyp turýy múmkin. Basqa eshteńe joq. Iaǵni, prezentatsiia túrinde esep berýdiń ózi tiptik túrde júzege aspaidy», - deidi Marat Mamaev.
