Densaýlyq saqtaý ministrligi Qoǵamdyq densaýlyq saqtaý komitetiniń tóraǵasy, elimizdiń bas sanitarlyq dárigeri Jandarbek Bekshin Senat spikeri Qasym-Jomart Toqaevtyń meningitke qatysty aitqan synyna jaýap berdi, - dep habarlaidy Tengrinews.kz tilshisi.
Munyń aldynda Parlament Senatynyń tóraǵasy Qasym-Jomart Toqaev eldegi menigitke qatysty profildegi ministrlik keshirilmeitin jaibasarlyq pen batylsyzdyq tanytyp otyr degen bolatyn.
"Siz bul jaǵdaidy toqtatýǵa qatysty barlyq talaptyń oryndalǵanyn estidińiz. Bizben birge mamandar jumys istep jatyr, olar bizdiń jumysty tolyq atqaryp jatqanymyzǵa baǵa berip jatyr. Barlyq úsh kezeń boiynsha. Birinshisi - aýrý oshaǵyn jáne dert juqtyrǵandarmen bailanysty bolǵandardy anyqtap, olarǵa dárigerlerdiń baqylaýymen antibiotikalyq aldyn alý jumystaryn júrgizý. Ekinshi - diagnostika. Úshinshi - bilikti em júrgizý. Bul úsh negizgi talap tolyq oryndalyp jatyr. Biz únemi turǵyndarmen kezdesý ótkizip jatqanymyzdy kórip otyrsyz", - dedi Jandarbek Bekshin OKQ-da ótken brifing kezinde.
Ol mundai jumystar aimaqtarda da júrgizilip jatqanyn atap ótti.
4 maýsymda Taldyqorǵanda 17 jastaǵy jigit meningitten qaitys bolǵany habarlandy. Bul aqparatty Almaty oblysy Qoǵamdyq densaýlyq saqtaý departamenti rastady. Al Densaýlyq saqtaý ministri Eljan Birtanov meningitke bailanysty Qazaqstanda karantin jariialanbaitynyn málimdegen bolatyn.
"Biz meningokokk infektsiiasyn juqtyrǵandar men qaitys bolǵandardyń sanyn jasyrmaimyz. Qazir karantin jariialaýdyń qajeti joq. (...) Qazaqstandyqtardan dárigerler aitqan keńesterdi tyńdaýlaryn suraimyz", - dedi Birtanov.
