Denis Tenniń anasy Oksana Ten qoǵamǵa úndeý jasady, - dep habarlaidy Tengrinews.kz.
"Denis Tenniń týystary atynan búkil Qazaqstan halqyna jáne halyqaralyq qoǵamdastyqqa bizdiń qaiǵymyzdy bólisip, osy bir aýyr kezeńde otbasymyzdy qoldaǵandary úshin alǵys aitamyz.
Erekshe alǵysty Nursultan Ábishuly Nazarbaevqa aitqymyz keledi. Prezident árdaiym Deniske kómektesip, qoldady.
Sonymen qatar, memlekettik organdarǵa jáne ákimdikke qoldaýlary úshin raqmet.
Qaiǵyly jaǵdai bolǵaly beri qazaqstandyq jáne halyqaralyq BAQ ókilderi birneshe ret habarlasty. Denistiń qazasy áli kúnge uǵynyqsyz bolyp otyr jáne qazir jýrnalisterdiń suraqtaryna jaýap berý úshin kúsh-qairat tabý bizge óte qiyn.
Bizdiń qaiǵymyzǵa jáne suhbat berýge daiyn emes ekenimizge túsinistikpen qaraýdy suraimyz. Ulymyzdyń atyn jáne ol týraly jaqsy estelikterdi saqtap qalaiyqshy!", - dedi Oksana Ten.
Eske sala keteiik, 19 shildede Almatyda belgisiz bireýler Denis Tendi pyshaqtap ketken bolatyn. Oqiǵa shamamen 15.00-de Qurmanǵazy men Baiseiitova kósheleriniń qiylysynda bolǵan. Keiin qalalyq IID ókilderi Denis Tenge avtourylar shabýyl jasaǵanyn málimdedi. Sóitsek, sportshy urylardyń ústinen túsken bolyp shyqty. Janjal kezinde sportshynyń aiaǵyna pyshaq tiip, kóp qan joǵaltqan. Ol aýrýhanada kóz jumdy.
