Astanadaǵy «Barys-Arena» muz saraiynda ótken Denis Tenmen qoshtasý rásiminde qoǵam qairatkerleri men tanymal sportshylar jyly estelikterimen bólisti, dep habarlaidy QazAqparat tilshisi.
«Bul kúni Denistiń jaqyndaryna kóńil aitýǵa da sóz tabý qiyn. Bul úlken qaiǵy jáne barlyǵymyz úshin sabaq boldy. Mundai qatelikke endi jol bermeý kerek. Qosh bol jáne bizdi keshir, Denis», - dedi QR Aqparat jáne kommýnikatsiialar ministri Dáýren Abaev sportshymen qoshtasý rásiminde.
Qoshtasýǵa kelgen Ońtústik Koreia Respýblikasynyń Qazaqstandaǵy elshisi Kim De Sik Denis Tenniń ólimin Qazaqstan úshin ǵana emes, álemdik qaýymdastyq úshin orny tolmas qaiǵy dep baǵalady. Elshi Denistiń táýelsizdik úshin kúresken tanymal korei generaly Min Gyn Honyń urpaǵy ekenin eske saldy.
«Asyl dosymyzdy eshqashan umytpaimyz», - dedi elshi.
Sonymen birge, Denispen qoshtasýǵa Qazaqstandaǵy Japoniia elshisi Itiro Kavabata da keldi. Ol Kúnshyǵys elindegi tabynýshylary atynan Denis Tenniń otbasyna jáne barsha Qazaqstan halqyna kóńil aitty.
«Bizdiń halqymyz Denistiń qos memleket arasyndaǵy dostyq qarym-qatynastardy nyǵaitýyna qosqan úlesin joǵary baǵalaidy. Kóptegen japondyq mánerlep syrǵanaýshylar qaiǵyǵa ortaqtasyp jatyr. Bul qaiǵyly habar Japoniia azamattaryna da aýyr tidi. Denis Tenniń tańǵajaiyp óneri men tulǵalyq kelbeti máńgi esimizde qalady», - dedi diplomat.
Odan keiin Denistiń qazasyna bailanysty qazaqstandyq boksshy Daniiar Eleýsinov jáne Konkimen júgirý sporty boiynsha Álem Kýbogy (1995) kezeńiniń jeńimpazy bolǵan Vadim Shakshabaev sóz sóiledi jáne kóz jastaryn tyia almaǵan astanalyqtar Denis Tendi «Keshir, qosh bol» sózderimen shyǵaryp saldy.
Aita keteiik, qazaqstandyq sportshy Denis Ten 19 shilde kúni pyshaqtan alǵan jaraqattan qaitys boldy. Sportshy kóliginiń ainasyn urlamaq bolǵan eki adamnyń qylmysynyń ústinen túsken. Arada bastalǵan janjaldyń saldarynan urylar Denis Tenge pyshaq salǵan.
