Kúdiktilerdiń biri Denis Tenge suqqan pyshaǵyn jasyrǵan jerdi kórsetti. Bul týraly qalalyq IID baspasóz qyzmeti málim etti, dep habarlaidy QazAqparat tilshisi.
Qazir qalalyq IID tergeý basqarmasy QR QK 99-babynyń 2-bólimimen sotqa deiingi tergeý isin júrgizip jatyr. Kúdiktiler Qiiasov pen Qudaibergenov óz qylmystaryn tolyq moiyndady.
"Kúdikti Qudaibergenov Arman tekserý kezinde sýyq qarý jasyrynǵan jerdi kórsetti. Pyshaq qylmystyq is materialdaryna qosyldy. Atalǵan is boiynsha birqatar saraptama: molekýliarly-genetikalyq, qarýdyń meditsinalyq-kriminalistikalyq, meditsinalyq-biologiialyq saraptamasy, sot meditsinalyq saraptama taǵaiyndaldy. Betpe-bet kezdesý barysynda Qiiasov Nuraly Denis Tenge pyshaq salǵanyn moiyndady", - delingen habarlamada.
Aita ketsek, Qazaqstandyq mánerlep syrǵanaýshy Denis Ten 19 shilde kúni pyshaq jaraqatynan qaza bolǵan edi. Oqiǵa Qurmanǵazy Baiseiitova kósheleriniń qiylysynda 19 shildede túski saǵat 15:00 shamasynda bolǵan. Sportshy kóliginiń ainasyn urlamaq bolǵan eki adamnyń ústinen túsken. Arada bastalǵan janjaldyń saldarynan urylar Denis Tenge pyshaq suǵyp alǵan. Ol oń jaq sanynyń joǵarǵy tusyna jaraqat aldy. 25 jastaǵy Ten úsh litr qan joǵaltyp, aýrýhanaǵa óte aýyr jaǵdaida jetkizildi. Biraq Almaty qalalyq Densaýlyq saqtaý basqarmasynyń basshysy Serikbol Mýsinov qosymsha qan qajet emestigin jáne resýrstar jetkilikti ekendigin málim etken bolatyn.
2,5 saǵatqa jalǵasqan reanimatsiialyq sharalarǵa qaramastan, aýrýhana dárigerleri onyń ómirine arasha túse almady. Saǵat 17.30-da Olimpiada júldegeri qaitys boldy.
Adam óltirý babymen qylmystyq is qozǵaldy.
