Batys Qazaqstan oblysynda Denis Tendi óltirgenderdi qoldaǵan muǵalimge qatysty tergeý júrgizilýde, dep habarlaidy "Ult aqparat".
Zelenov aýdany Beles aýylynda turatyn matematika pániniń muǵalimi Sherhan Baizenov Instagramdaǵy paraqshasynda Denis Tendi óltirgenderdi qoldap, jazba qaldyrǵan bolatyn. Bul jazba áleýmettik jeli qoldanýshylarynyń ashý-yzasyn týdyrǵannan keiin ol bul isi úshin kópshilikten keshirim surady.
BQO ishki ister departamentiniń baspasóz qyzmetinen túsken málimetke qaraǵanda, qazirgi ýaqytta Sh.Baizenovke qatysty QR QK 174-baby 1-bóligine sáikes (áleýmettik, ulttyq, rýlyq, násildik, tektik-toptyq nemese dini alaýyzdyqty qozdyrý) qylmystyq is qozǵalyp, tergeý amaldary júrgizilýde.
Sh.Baizenovten eshqaida ketpeý týraly qolhat alyndy.
Zelenov aýdandyq bilim bóliminiń basshysy Serik Safiýllin Oraldaǵy pedkolledjdi bitirgen Sh.Baizenovtiń Beles orta mektebinde 5-9-synyptarǵa matematika páninen sabaq beretindigin, qazir eńbek demalysynda ekendigin jetkizdi. Oǵan qatysty shara qylmystyq is aiaqtalǵannan keiin qoldanylatyn bolady.
Aita keteiik, QR QK 174-baby 1-bóligine sáikes qylmysy dáleldengen adam eki jyldan jeti jylǵa deiingi merzimge bas bostandyǵynan shekteýge ne sol merzimge bas bostandyǵynan aiyrylýy múmkin.
Eske salaiyq, Qazaqstandyq mánerlep syrǵanaýshy Denis Ten 19 shilde kúni pyshaq jaraqatynan qaza bolǵan edi. Oqiǵa Qurmanǵazy Baiseiitova kósheleriniń qiylysynda 19 shildede túski saǵat 15:00 shamasynda bolǵan. Sportshy kóliginiń ainasyn urlamaq bolǵan eki adamnyń ústinen túsken. Arada bastalǵan janjaldyń saldarynan urylar Denis Tenge pyshaq suǵyp alǵan. Ol oń jaq sanynyń joǵarǵy tusyna jaraqat aldy. 25 jastaǵy Ten úsh litr qan joǵaltyp, aýrýhanaǵa óte aýyr jaǵdaida jetkizildi. Biraq Almaty qalalyq Densaýlyq saqtaý basqarmasynyń basshysy Serikbol Mýsinov qosymsha qan qajet emestigin jáne resýrstar jetkilikti ekendigin málim etken bolatyn.
2,5 saǵatqa jalǵasqan reanimatsiialyq sharalarǵa qaramastan, aýrýhana dárigerleri onyń ómirine arasha túse almady. Saǵat 17.30-da Olimpiada júldegeri qaitys boldy.
Adam óltirý babymen qylmystyq is qozǵaldy.
