Mánerlep syrǵanaýdan 2014 jyly Sochide ótken qysqy Olimpiada oiyndarynyń qola júldegeri Denis Ten Phenchhandaǵy dodany qysqa baǵdarlamadan keiin-aq aiaqtady. Otandasymyz 30 qatysýshynyń ishinde finaldyq kezeńge ótetin 24 sportshy qataryna qosyla almady, - dep habarlaidy "Ult aqparat" Vesti.kz portalyna silteme jasap.
Jaraqatynan jańa aiyǵyp júrgen qazaqstandyq sportshy úshin Phenchhandaǵy aq Olimpiada sátsiz ótti. Qysqa baǵdarlamada Denis 70,12 upai jinap, nátijesi tómen boldy. 30 sportshy ishinde 27-orynǵa taban tiredi.
"Osyǵan deiin de aitqanymdai, bul maýsym men úshin óte qiyn boldy. Degenmen de Phenchhanǵa kelip, óner kórsetip jatqanymdy maqtan tutamyn. Sebebi men kúndelikti uiyqtar aldynda aiaǵymnyń aýyryp jatqanyn sezetinmin. Bul men úshin kúndelikti kúres bolyp ketti. Phenchhanǵa qatty kelgim keldi. Osynda kelgenime qýanyshtymyn. Biraq, ókinishke qarai, barlyǵy oidaǵydai bolmady. Degenmen kóńilimdi túsirmeimin. Bolashaqta babyma kelýge tyrysamyn", - dedi Denis Ten.
Sondai-aq, mánerlep syrǵanaýshy sońǵy ret Ońtústik Koreia jerinde jaraqat alyp, baldaq jáne gipspen qaitqanyn da aityp, Olimpiadaǵa baryn sala daiyndalǵanyn da jasyrmady.
"Sport qurbandyqty talap etedi, biraq men aqtalýdy qalamaimyn. Men rasymen de, týrnirge barynsha daiyndaldym. Qansha kúsh salyp, daiyndalsań da úmitińniń aqtalmaǵany jaman. Biraq bul ómir ǵoi. Sátsiz óner kórsetkenimen qaramastan alda meni jáne búkil Qazaqstan quramasyn tamasha jetistikter kútýde dep bilemin. Al úshinshi Olimpiada qatysqanyma qýanyshtymyn, sońǵysy emes dep oilaimyn", - dedi sportshy.
Qysqa baǵdarlama boiynsha japon Iýdzýrý Haniý kósh bastady. Ol 111,68 upaiǵa ie boldy. Ekinshi orynda ispan Haver Fernandes keledi. Onyń ónerin tóreshiler 107,58 upaimen baǵalady. Úzdik úshtikti taǵy bir japon mánerlep syrǵanaýshysy Shoma Ýno (104,17 upai) túiindep tur.
Denis Ten qysqy Olimpiada oiyndaryna 2010 jyly alǵash ret qatysty. Ol erler arasyndaǵy eń jas sportshy boldy. Ol kezde otandasymyzdyń jasy 16-da edi. Jarys qorytyndysy boiynsha 11-oryn aldy. Sochide Qazaqstan quramasynyń qorjynyna túsken bir qolany enshiledi.
