Almaty politsiiasy Denis Tenniń ólimine qatysty sotqa deiingi tergeý isiniń barysyn jariialady, dep habarlaidy QazAqparat tilshisi.
Qalalyq IID habarlaýynsha, atalǵan oqiǵany kózimen kórgen adamdar da tabyldy. Olar Denis Tenge qol salǵan kúdiktiler ekenin aitty.
«Betpe-bet kezdesý barysynda Qiiasov Nuraly Denis Tenge pyshaq salǵanyn moiyndady. Sonymen qatar, oqiǵa kýágerleri de tabyldy. Olar kúdiktilermen kezdesý barysynda osy adamdardyń Denisti óltirgenin aitty. Tergeý barysynda QR QK protsestik talaptaryna sáikes olardyń quqyqtary túsindirildi», - dedi baspasóz qyzmetinen.
Aita ketsek, Qazaqstandyq mánerlep syrǵanaýshy Denis Ten 19 shilde kúni pyshaq jaraqatynan qaza bolǵan edi. Oqiǵa Qurmanǵazy Baiseiitova kósheleriniń qiylysynda 19 shildede túski saǵat 15:00 shamasynda bolǵan. Sportshy kóliginiń ainasyn urlamaq bolǵan eki adamnyń ústinen túsken. Arada bastalǵan janjaldyń saldarynan urylar Denis Tenge pyshaq suǵyp alǵan. Ol oń jaq sanynyń joǵarǵy tusyna jaraqat aldy. 25 jastaǵy Ten úsh litr qan joǵaltyp, aýrýhanaǵa óte aýyr jaǵdaida jetkizildi. Biraq Almaty qalalyq Densaýlyq saqtaý basqarmasynyń basshysy Serikbol Mýsinov qosymsha qan qajet emestigin jáne resýrstar jetkilikti ekendigin málim etken bolatyn.
2,5 saǵatqa jalǵasqan reanimatsiialyq sharalarǵa qaramastan, aýrýhana dárigerleri onyń ómirine arasha túse almady. Saǵat 17.30-da Olimpiada júldegeri qaitys boldy.
Adam óltirý babymen qylmystyq is qozǵaldy.
