Beisenbi kúni AQSh senatynda aiyptaý taraby burynǵy prezident Donald Trampqa qarsy argýmentterdiń barlyǵyn baiandap boldy. Juma jáne senbi kúnderi qorǵaý taraby sóileidi dep habarlady "Amerika daýysy" saity.
Ókilder palatasy qańtar aiynda ókiletiniń aiaqtalýyna bir apta qalǵanda Trampqa impichment jariialaǵan. Ony 6 qańtar kúni jaqtastaryn Kapitoliige shabýyl jasaýǵa itermeledi dep aiyptaǵan.
Impichment isi boiynsha talqylaýǵa aiyptaý taraby retinde qatysyp jatqan ókilder palatasyndaǵy demokrattar úsh apta boiy Tramptyń sózi Kapitoliige shabýyl jasaýǵa túrtki boldy degen tujyrymdy dáleldeýge tyrysty.
Kongreske Kaliforniia shtatynan sailanǵan Daiana Degett 6 qańtar kúni Tramp sózi men kongress ǵimaratyna shabýyl jasaǵandardyń kótergen urandary arasynda uqsastyq baryn atap ótti. Budan bólek, onyń sózine qaraǵanda, shabýyldaýshylardyń keibiri prezidenttiń shaqyrýymen Kapitoliige kelgenin aitqan. Degett dálel retinde 6 qańtar kúngi videojazbalardy kórsetken. Onyń aitýynsha, oqiǵaǵa qatysýshylar "prezident buiryǵyn oryndap otyrǵandyqtan" jazalanbaimyz dep oilaǵan.
6 qańtar kúngi oqiǵanyń saldaryna toqtalǵan Degett oqiǵa eldiń halyqaralyq bedeline de ziian keltirdi dep málimdedi. Reseidiń resmi sheneýnikteriniń aitqandarynan da úzindi keltirdi.
Taǵy bir kongressmen Ted Liý Tramptyń kongreske shabýyldy birde-bir ret aiyptamaǵanyn, tipti olarǵa baǵyttalǵan úndeýinde shabýyldaýshylardy qoldaǵan saryn ańǵarylatynyn da alǵa tartty.
Aiyptaý taraby sonymen birge shabýyl kezinde vitse-prezident, ókilder palatasynyń spikeri men ózge de memleket basshylarynyń ómirine tikelei qaýip tóngenin aitty. Atap aitqanda, senatta kórsetilgen kadrlardan bir top demonstranttardyń vitse-prezidentti izdep júrgeni jáne Maik Penstiń otbasymen birge olardan nebári 30 metr qashyqta bolǵanyn kórýge bolady.
Al Trampty qorǵaý taraby prezident Kapitoliidegi shabýylǵa jaýap bermeidi, sebebi ol jaqtastaryn shtýrm jasaýǵa tikelei shaqyrmady deidi.
Eger Tramp kináli bolyp shyqsa da, oǵan qyzmetinen ketý qaýpi tónbeidi: sebebi 20 qańtarda ókileti aiaqtalǵan Tramp sol kúni qyzmetinen ketken. Al demokrattar onyń bolashaqta sailaýǵa túsýine jol bergisi kelmeidi. Aiyptaý qorytyndy shyǵý úshin senatorlardyń úshten ekisiniń daýysy kerek. Biraq sarapshylar bulai bolýy ekitalai deidi.
