Elordada demalys kúnderine engizilgen eki karantin jedel járdemge habarlasýshylar sanyn azaitty. Bul týraly Nur-Sultan qalasynyń ákimi Altai Kólginov aityp berdi, dep habarlaidy QazAqparat.
«22-28 maýsym kúnderi Nur-Sultan qalasynyń jedel járdem stansasyna óte kóp adam habarlasty. Buryndary táýligine 2-2,5 myń qońyraý qabyldansa, bul kúnderi 4 300-den astam adam habarlasqan. Demalys kúnderine engizilgen eki karantinnen soń bul sandar aitarlyqtai tómendedi. Qazir de úshinshi táýlik karantin rejiminde jumys istep jatyrmyz, jedel járdem stansasyna habarlasýshylar sany azaiyp, qaitadan 2 090 qońyraýǵa deiin tústi. Biz azamattardyń jaǵdaidy sanaly túrde túsingenin kórip otyrmyz. Bul ózińiz ben jaqyndaryńyzdyń densaýlyǵyn saqtaýǵa, dárigerlerdiń júktemesin azaitýǵa septigin tigizedi», - dedi qala ákimi Ortalyq kommýnikatsiialar qyzmetinde ótken brifingide.
Ákimniń aitýynsha, jedel járdem stansalarynda 110 brigada bolsa, qazir olardyń sany 150-ge jetken.
Aita keteiik, Nur-Sultanda koronavirýs infektsiiasyn juqtyrǵan 61 adam qaitys boldy. Sonymen birge, elorda aýrýhanalaryna 200 ókpe jeldetý apparatyna tapsyrys berildi.
