QR Ulttyq banki tóraǵasynyń orynbasary Oleg Smoliakov «Delta Bank» AQ-nyń banktik jáne ózge de operatsiialardy júrgizýge, qundy qaǵazdar naryǵynda qyzmet atqarýǵa arnalǵan litsenziiasynyń qaitarylyp alynýyna qatysty BAQ ókilderinen túsip jatqan saýaldarǵa jaýap berdi, dep habarlaidy QazAqparat.
«Delta Bank» AQ-ty litsenziiadan aiyrý týraly sheshim kelesi faktorlardyń bolýyna negizdelgen. Birinshi kezekte, zaemshylardy nesieleýge múmkindik bergen kredittik táýekelderdi basqarý boiynsha ishki protsedýralardyń jetkiliksizdigi, turaqsyz qarjylyq jai-kúidiń bolýy, sonymen qatar sapaly kepilmen qamtamasyz etilmegen zaimdardy berý kredit boiynsha óteý merzimi ótip ketken bereshektiń aitarlyqtai ósimine túrtki boldy. Máselen, 2017 jyldyń 1 qazanynda óteý merzimi ótip ketken zaimdar banktiń uaryz qorjynyń 99,7 paiyzyn (314,8 mlrd teńge) qurady», - dedi ol.
Onyń aitýynsha, ekinshiden, litsenziiadan aiyrý týraly sheshim qabyldanǵan kezde banktiń korrespondenttik esepshottarynda jáne kassasynda qalǵan aqsha 215,1 mln teńgeni quraǵan. Al dál osy kezdegi depozitorlar men kreditorlar aldyndaǵy óteý merzimi ótip ketken mindetteme somasy shamamen 79,8 mlrd teńge bolǵan. Osyǵan bailanysty Ulttyq bank uzaq ýaqyttan beri «Delta Bank» AQ menedjerlerimen jáne aktsionerlerimen ashyq suhbat júrgizip, bankke qarjylyq qoldaý qajet ekendigin belgilep bergen. Alaida banktiń iri aktsioneri tarapynan bankke qarjylai qoldaý kórsetilmegen.
«Bank sektoryndaǵy jiyntyq aktivter men mindettemelerdegi bul banktiń aktivteri men mindettemeleriniń úlesi tómen ekendigine bailanysty banktiń litsenziiadan aiyrylýy ózge qarjylyq institýttarǵa qandai da bir táýekel ákelmeitindigin atap ótemiz. QR Ulttyq banki tóraǵasynyń 2017 jylǵy 2 qarashadaǵy №402 buiryǵymen ýaqytsha ákimshilik taǵaiyndalyp, oǵan banktiń barlyq basqarý organdarynyń ókilettigi berildi. Ýaqytsha ákimshilik sotpen taratý komissiiasy taǵaiyndalǵanǵa deiin jumys isteitin bolady», - dedi Oleg Smoliakov.
UB tóraǵasy orynbasarynyń sózine qaraǵanda, 3 qarashadan bastap klientterdiń jáne banktiń banktik esepshottary boiynsha barlyq operatsiialar toqtatyldy. Tek ókiletti organdardyń normativtik-quqyqtyq aktilerinde kózdelgen shyǵystarmen bailanysty bankke túsetin aqshalardy aýdarý ǵana júrgiziledi.
«QR Ulttyq banki belgilengen zańnamalyq tártippen sotqa bank qyzmetin májbúrli túrde toqtatý týraly aryz berdi», - dedi ol.
Buǵan qosa, ol atalǵan bank jeke tulǵalardyń depozitterin mindetti kepildendirý júiesine qatysýy ekendigin eskertip ótedi. Onyń dereginshe, teńge túrindegi depozit boiynsha kepil berilgen soma 10 mln teńge deiingi, al shetel valiýtasynda 5 mln teńgege deiingi somany quraidy. Osyǵan bailanysty depozitorlarǵa belgilengen tártippen kepil berilgen soma óteledi.
