Biyldan bastap mektepke jumysqa turatyn mamandar kásibi sheberligi boiynsha sertifikattaýdan ótedi. Alaida bul talap buǵan deiin sabaq bergen, biraq qazir dekrette otyrǵan analarǵa qatysty emes. Bul týraly bilim jáne ǵylym ministri Ashat Aimaǵambetov málimdedi, dep habarlaidy Sputnik Qazaqstan.
"Biyl mektepke jumysqa qabyldanatyndardyń bári sertifikat alýy kerek dep jatyr. Men úsh jyl boiy dekrette otyrdym, jumys istegen joqpyn. Sonda bul sertifikatty men de alýym kerek pe?", - dep surady dekrettegi muǵalimderdiń biri ministrden.
"Bul - sizderge qatysty talap emes. Eger siz dekrette bolsańyz, mektepke oralyp, ári qarai jumysyńyzdy jalǵastyrýǵa bolady. Sizderden eshkim eshqandai jańa sertifikat talap etpeidi", - dep jaýap berdi Aimaǵambetov halyqqa esep berý kezdesýinde.
Ol sertifikattaý oqý ornyn endi ǵana támamdaǵan túlekterge arnalǵan talap ekenin atap ótti.
"Eger ol jaqsy bilim alsa, bilikti maman bolsa, ýniversitetti bitirgen boida ulttyq biliktilik testin tapsyrý oǵan esh qiynǵa soqpaidy. Tórt jyl boiy pedagogikalyq mamandyq boiynsha oqyǵan adam ony esh problemasyz tapsyrady. Tapsyrǵannan keiin sertifikatyn alyp, mektepke barady. Óziniń shyn máninde teoriia júzinde ǵana emes, tájiribede de sabaq ótkize alatynyn kórsetedi. Biraq bul biyl joǵary oqý ornyn bitirgen jáne buǵan deiin mektepte eshqashan jumys istemegen, jumysqa endi kiriskeli jatqan áriptesterge qoiylatyn talap", - dep túsindirdi ministr.
Aimaǵambetov sertifikattaýdaǵy eń basty maqsat – mektepterde bilim sapasyn kóterý ekenin aitty.
Buǵan deiin 2021 jyldan bastap pedagogikalyq mamandyq boiynsha jumysqa alǵash ret turý úshin úmitkerler kásibi sheberligi boiynsha sertifikattaýdan ótetini habarlanǵan edi. Iaǵni diplomǵa qosa tiisti kvalifikatsiia alý mindeti engiziledi.
Sondai-aq, pedagogter jumysqa konkýrs arqyly qabyldanady. Ol tolyǵymen elektrondy formatta júredi.
