Frantsiia prezidenti Emmanýel Makron, Germaniia kantsleri Angela Merkel, Ońtústik Afrika prezidenti Siril Ramafosa jáne birqatar saiasatker men memleket ókilderi juma, 24 sáýirde koronavirýs indetimen kúres máselesine arnalǵan jańa halyqaralyq bastamany talqylaý úshin videokonferentsiia ótkizdi.
Bul bastama jyldam ýaqyt aralyǵynda COVID-19 aýrýyn anyqtaityn qaýipsiz ári tiimdi test pen ekpe, dári-dármekter shyǵarýdy kózdeidi. Konferentsiiaǵa qatysýshylar aýrýdyń aldyn alý jáne emdeý quraldary bai men kedeige birdei qoljetimdi bolǵanyn qalaidy.
"Bárimizdiń aldymyzda ortaq qaýip tur, ony birigip, kúsh jumyldyryp jeńe alamyz" dedi Dúniejúzilik densaýlyq saqtaý uiymynyń jetekshisi Tedros Gebreiesýs.
Onyń sózine qaraǵanda, dári-dármek pen preparattar bolǵan kúnniń ózinde oǵan ártúrli toptaǵy naýqastardyń biriniń qoly jetedi, biriniki jetpeidi.
"Buǵan jol berýge bolmaidy" dedi DDSU jetekshisi.
Eýropa komissiiasynyń tóraiymy Ýrsýla fon der Liaien halyqaralyq qaýymdastyqtyń jańa aýrýdy anyqtaý, odan qorǵaný jáne emdeý jumystaryna 7,5 mlrd eýro kóleminde qarjy jinaýdy josparlap otyrǵanyn aitty.
