فرانتسييا پرەزيدەنتٸ ەممانۋەل ماكرون, گەرمانييا كانتسلەرٸ انگەلا مەركەل, وڭتٷستٸك افريكا پرەزيدەنتٸ سيريل رامافوسا جەنە بٸرقاتار ساياساتكەر مەن مەملەكەت ٶكٸلدەرٸ جۇما, 24 سەۋٸردە كوروناۆيرۋس ٸندەتٸمەن كٷرەس مەسەلەسٸنە ارنالعان جاڭا حالىقارالىق باستامانى تالقىلاۋ ٷشٸن ۆيدەوكونفەرەنتسييا ٶتكٸزدٸ.
بۇل باستاما جىلدام ۋاقىت ارالىعىندا COVID-19 اۋرۋىن انىقتايتىن قاۋٸپسٸز ەرٸ تيٸمدٸ تەست پەن ەكپە, دەرٸ-دەرمەكتەر شىعارۋدى كٶزدەيدٸ. كونفەرەنتسيياعا قاتىسۋشىلار اۋرۋدىڭ الدىن الۋ جەنە ەمدەۋ قۇرالدارى باي مەن كەدەيگە بٸردەي قولجەتٸمدٸ بولعانىن قالايدى.
"بەرٸمٸزدٸڭ الدىمىزدا ورتاق قاۋٸپ تۇر, ونى بٸرٸگٸپ, كٷش جۇمىلدىرىپ جەڭە الامىز" دەدٸ دٷنيەجٷزٸلٸك دەنساۋلىق ساقتاۋ ۇيىمىنىڭ جەتەكشٸسٸ تەدروس گەبرەيەسۋس.
ونىڭ سٶزٸنە قاراعاندا, دەرٸ-دەرمەك پەن پرەپاراتتار بولعان كٷننٸڭ ٶزٸندە وعان ەرتٷرلٸ توپتاعى ناۋقاستاردىڭ بٸرٸنٸڭ قولى جەتەدٸ, بٸرٸنٸكٸ جەتپەيدٸ.
"بۇعان جول بەرۋگە بولمايدى" دەدٸ ددسۇ جەتەكشٸسٸ.
ەۋروپا كوميسسيياسىنىڭ تٶرايىمى ۋرسۋلا فون دەر ليايەن حالىقارالىق قاۋىمداستىقتىڭ جاڭا اۋرۋدى انىقتاۋ, ودان قورعانۋ جەنە ەمدەۋ جۇمىستارىنا 7,5 ملرد ەۋرو كٶلەمٸندە قارجى جيناۋدى جوسپارلاپ وتىرعانىن ايتتى.
