Álem boiynsha koronavirýs juqtyrǵandar sany sońǵy aptada 2,4 million adamǵa artty. Bul – pandemiia bastalǵaly eń joǵary kórsetkish, dep habarlaidy "Ult aqparat" DDSU derekterine silteme jasap.
Uiym atap ótkendei, COVID-19 virýsyna shaldyǵýshylar sany jedel qarqynmen ósýde, al indetten bolǵan jańa ólim jaǵdailarynyń sany salystyrmaly túrde turaqty bolyp otyr. Sońǵy jeti kúnde infektsiiadan 36 myńnan astam adam qaitys boldy, bul shamamen ótken aptadaǵy kórsetkishpen sáikes keledi.
«18 qazandaǵy jaǵdai boiynsha 40 millionnan astam adam aýrý juqtyrǵany týraly jáne qaitys bolǵandar sany 1,1 millionǵa jetkeni jaily habarlama kelip tústi», - dep kórsetilgen DDSU málimetinde.
Eń aýyr epidemiologiialyq ahýal Soltústik jáne Ońtústik Amerikada baiqalady. Munda 12-18 qazan aralyǵynda 798 myń adam koronavirýsqa shaldyqqan, al infektsiia juqtyrǵandardyń jalpy sany 18,8 million patsientten asty. Bir aptada 16 myńnan astam adamnyń qaitys bolǵandyǵy tirkelgen. 18 qazandaǵy jaǵdai boiynsha indetten kóz jumǵandardyń jalpy sany 608 myńnan astam.
Eýropada ótken aptamen salystyrǵanda aýrýǵa shaldyǵýdyń 25 paiyzdyq ósimi tirkeldi. Virýs juqtyrǵandar sany 927 myńnan asyp, jalpy 8 millionnan astam adamǵa jetti. Bir apta ishinde 8 myńnan astam adam qaitys boldy, al ólim jaǵdailarynyń jalpy sany 256 myńnan asty.
