2021 jyldyń 26 aqpany kúni Dúniejúzilik densaýlyq saqtaý Reseide adamnyń H5N8 virýsyn juqtyrýdyń álemdegi alǵashqy oqiǵasy tirkelgenin rastady. Buǵan deiin virýs tek qustar arasynda ǵana taralǵan edi. Virýsty eldiń ońtústik óńirleriniń birindegi qus fabrikasynda jumys isteitin 7 qyzmetker juqtyryp alǵan. Virýs indetke shaldyqqandardan odan ári taramaǵan, bul onyń adamnan adamǵa juqpaitynyn kýálandyrady. Bul týraly BUU jańalyqtary saitynda habarlandy.
«2021 jyldyń 18 aqpanynda Resei Federatsiiasyndaǵy ulttyq úilestirýshi DDSU-ǵa 7 adamnyń klinikalyq taldaýynda qus tumaýy (H5N8) anyqtalǵanyn málimdedi», - delingen DDSU habarlamasynda. Onda virýstyń Astrahan oblysyndaǵy qus fabrikalarynyń birindegi qyzmetkerlerden anyqtalǵany atap ótiledi.
Reseidiń DDSU-ǵa málimdeýinshe, 3-11 jeltoqsan kúnderi aralyǵynda Astrahan oblysyndaǵy fermalardyń birinde 900 myń taýyqtyń 101 myńy qyryldy. Bul jaǵdaidan keiin arnaiy tergeý júrgizildi. Qustardan synamalar alynyp, Reseidiń óńirlik veterinarlyq zerthanasy odan A (H5N8) qus tumaýynyń belgilerin anyqtaǵan.
«Qoldaǵy málimetke súiene otyryp, virýstyń adamnan adamǵa juǵý qaýpi tómen bolyp qalyp otyrǵanyn aitýǵa bolady», - delingen DDSU málimdemesinde.
Buǵan deiin bul máselege qatysty Rospotrebnadzor basshysy Anna Popova túsinikteme bergen edi, dep habarlaidy TASS aqparat agenttigip.
«Ázirge biz A(H5N8) qus tumaýyn qozdyrýshy qustardan adamǵa juǵa alatynyn kórip turmyz – ol túraralyq kedergini buza aldy. Biraq virýstyń bul nusqasy búginde adamnan adamǵa taralmaidy», - dedi Anna Popova.
2020 jyly qus tumaýynyń A (H5N8) virýstary sondai-aq Qazaqstan, Bolgariia, Ulybritaniia, Vengriia, Germaniia, Mysyr, Irak, Niderlandy, Polsha, Rýmyniia, Chehiia, Japoniia, Koreia, Qytai jáne ózge elderdegi úi jáne jabaiy qustardan anyqtalǵan. Alaida bul virýstyń adamǵa juqqany týraly habarlamalar buǵan deiin túsken joq.
