Foto: elements.envato.com, ©REUTERS
Dúniejúzilik densaýlyq saqtaý uiymynyń basshysy Tedros Adhanom Gebreiesýstyń nemeresi dúniege keldi, - dep habarlaidy Tengrinews.kz.
Bul aqparatty DDSU basshysynyń kelini Aidananyń atasy Júrsin Erman rastady. Onyń aitýynsha, jańa týǵan sábige Kai degen esim bergen.
"Atyn men emes, balanyń ata-anasy qoidy. Ony Kai dep atady", - dedi Júrsin Erman.
Ol qazaqstandyq Aidana men Tedrostyń uly Ammanýildiń (Oman) ekinshi balasy ekeni belgili boldy.
Qazir olar Shveitsariiada turady. Aidananyń anasy jańa jyldy qudalarymen óz úiinde qarsy alatyndaryn, beshbarmaq daiyndaitynyn aitty. Onyń aitýynsha, jańa týǵan nemeresi Tedrosqa uqsaidy. Balanyń salmaǵy - 4150 gramm, boiy - 52 santimetr. Ol 29 jeltoqsanda dúniege keldi.
Jaqynda qazaqstandyqtar DDSU basshysynyń kelini belgili aitysker Júrsin Ermannyń nemeresi ekenin bilgende tańǵalǵan edi.
"Meniń Ardaq degen kishi qyzym bar. Sodan týǵan Aidana degen jien qyz bar. Aidanany ertede Jańa Zelandiiaǵa oqýǵa jiberip, mektepte oqytqanbyz. Til úirený degen naýqan bastalǵan. Sol eldiń mektebin bitirgen soń Shveitsariiaǵa baryp, ózi akademiiaǵa oqýǵa tústi. Sony bitirgen soń Ispaniiaǵa baryp, magistratýrasyn oqydy. Jien qyz qazir 30-ǵa keldi. Osydan tórt jyl buryn turmysqa shyqty. Sol kezde Almatyda uzatý toiyn jasadyq. Sol shyqqan kúieýi VOZ-dyń (DDSU-ny aityp otyr) bas direktorynyń Oman degen úlken balasy bolyp shyqty", - dedi Júrsin Erman.
Buǵan deiin Dúniejúzilik densaýlyq saqtaý uiymynyń basshysy Tedros Adhanom Gebreiesýs áleýmettik jelide aqyn Júrsin Ermanǵa arnap, qazaq tilinde video jariialaǵan edi.
"Qurmetti Júrsin quda! Sizderdi mereitoiyńyzben quttyqtaimyn. Myqty densaýlyq jáne uzaq ómir tileimin. Qudalyǵymyz myń jyldyq bolsyn", - dedi DDSU bas direktory Qazaqstannyń eńbek sińirgen qairatkerine.
