Almatyda ótken referendým kezinde sonshalyqty zańbuzýshylyq tirkelgen joq, daýys berýdi uiymdastyrý aitarlyqtai jaqsarǵanyn baiqadyq. Jazýshy, ekonomist ári qoǵam qairatkeri Beknur Qisyqov osylai dep otyr. Ol táýelsiz baqylaýshylardy oqytyp, ózi de qaladaǵy daýys berý barysyn baqylapty.
Onyń aitýynsha, referendýmdy baqylaýǵa Qazaqstan boiynsha «Halyq úni» qoǵamdyq birlestiginen daiyndyqtan ótken eriktiler eken.
«Búkil Qazaqstan boiynsha bizdiń koalitsiia men bastama aiasynda shamamen eki myńdai adam baiqaýshy retinde qatysty. Bular aqsha úshin emes, óz erkimen kelgen jastar bolatyn. Sebebi olar el ómirindegi osy mańyzdy kezeńge qatysqysy keldi. Biz olarǵa treningr ótkizip, baiqaý erejeleri men quqyqtyq normalardy túsindirdik. Nátijesinde olar jetkilikti joǵary daiyndyq pen kásibilik deńgeiin kórsetti», – dedi Beknur Qisyqov.
Ol eldiń ár óńirinde sailaýshylardyń qatysý belsendiligi aitarlyqtai aiyrmashylyq kórsetkenin atap ótti. Keibir oblysta ol 87–90%-ǵa deiin jetse, Almatyda shamamen 33% bolǵan.
«Alǵash qaraǵanda 33% az bolyp kórinýi múmkin. Biraq qalanyń úlken ekenin de eskerý kerek: munda adamdar mobildi ári saiasi protsesterge kózqarasy basqasha bolýy múmkin. Sondyqtan Almaty úshin bul kórsetkish te mańyzdy dep aitýǵa bolady», – dep túsindirdi.
Beknur Qisyqovtyń aitýynsha, baqylaýshylar jekelegen daýly jaǵdailardy tirkegen. Kóbine olar ýchaskedegi onlain-transliatsiialar, biýlletenderdi sýretke túsirý nemese daýys beretin kúni áleýmettik jelide úgit jazý siiaqty nárseler bolǵan.
«Qazir blogerler men áleýmettik jeliniń belsendileri keide ýchaskeniń ózinde óz pozitsiiasyn bildirýge tyrysady. Keibir adamdar biýlletendi sýretke túsirip, internetke jariialaǵan jaǵdailar boldy, alaida buǵan tyiym salynǵan. Sondai-aq onlain-transliatsiialar boiynsha da daýlar týyndady: zańda bul naqty jazylmaǵanymen, mundai áreket daýys berý qupiiasyna kedergi keltirýi múmkin degen ereje bar. Sondyqtan osy máseleler tóńireginde biraz kelispeýshilik boldy», – deidi ol.
Beknur Qisyqovtyń sózinshe, Almatyda baqylaýshylar biýlletenderdi jappai tastaý siiaqty eleýli zańbuzýshylyqty tirkemegen. Sailaýdy uiymdastyrý jaǵy jetilip kele jatyr.
«Aldyńǵy naýqanmen salystyrsaq, uiymdastyrý deńgeii artqan. Ýchaskelerde aqparattyq stendter, bailanys derekteri, shemalar, jáshikterdiń ornalasýy - bári standartqa sai rásimdelgen. Tipti materialdardyń geometriiasy men ornalastyrylýy siiaqty usaq-túiekke deiin kásibi jasalǵan. Jalpy alǵanda, daýys berý tynysh ótti», – dep qosty Beknur Qisyqov.
