Aqparat jáne qoǵamdyq damý ministri Dáýren Abaev Jaiyq ózenindegi balyqtardyń qyrylý sebebin atady, dep habarlaidy QazAqparat tilshisi.
«Jaiyq ózeninde balyqtyń qyrylýy boiynsha alǵashqy fakt anyqtalǵan kezde - ótken jyldyń jeltoqsan aiynda birden vedomstvoaralyq komissiia qurylǵan bolatyn. Onyń quramyna barlyq jaýapty memlekettik organdardyń - qalalyq ákimdikten bastap tabiǵat qorǵaý prokýratýrasynyń ókilderi kirdi. Áý basta ártúrli nusqalar aitylyp jatty. Máselen, qatal qysta muzdyń qalyńdyǵynan otteginiń jetispei qalýy saldarynan balyqtar tunshyǵyp qaldy degen boljam boldy. Budan bólek, balyqtyń qyrylýyna epidemiia sebep boldy degen boljam da aitylyp jatty. Aqyry, komissiia - buǵan himiialyq ýlaný sebep boldy degen sheshimge keldi», - dedi Dáýren Abaev «Habar» arnasyndaǵy «Ashyq dialog» baǵdarlamasynda.
Ministr sonymen birge bul jaǵdaiǵa kim kináli degen suraqqa jaýabyn bere ketti.
«Qazirgi ýaqytta maǵan belgili bolyp otyrǵandai, ózenge ziiandy himikattardy shyǵardy degen kúdikke 4 kompaniia iligip otyr. Osy kompaniialardyń bárine tekseris júrgizilip jatyr. Biraq, kimniń naqty aiypty ekenin tergeý kórsetedi. Eń bastysy, tutynýǵa kelmeitin balyqty dúkenderdiń sóresine túsip ketpeýi baǵytynda barlyq sharalar qolǵa alynyp jatyr. Bul sharýamen tiisti qyzmetter, veterinariia men sanepidemstantsiia qyzmetteri ainalysýda. Olar Atyraý qalasynyń dúkenderine kúndelikti reid júrgizip júr», - deidi Dáýren Abaev.
