Sheneýnikterdiń BAQ-tan «tumshalanyp» júretin ýaqyty ótti. Mundai pikirdi búgin Almatyda ótken «Media quryltaida» QR Aqparat jáne kommýnikatsiialar ministri Dáýren Abaev aitty, dep habarlaidy Ult.kz tilshisi QazAqparat agenttigine silteme jasap.
«Hanymdar men myrzalar, memlekettik organdardyń jabyq bolǵan mezgili ótip barady dep sizderdi sendire alamyn. Sizder de, bizder de qazirgi ýaqytta memlekettik organdardyń tiimdiligi onyń BAQ-pen bailanysymen anyqtalatyn bolatynyn jaqsy túsinemiz. Bul - qazirgi ýaqytta bar mindetti talap. Sondyqtan, memorgan jabyq bolǵan, ministrdiń jabyq bolǵan ýaqyttary ótip barady. Bul - qalypty úrdis», - dedi «Media quryltai - 2016» aiasynda jańa BAQ týraly jýrnalister suraǵyna jaýap bergen Dáýren Abaev.
Onyń aitýynsha, kelesi jyly media naryq jáne onyń qatysýshylary týraly aqparat jaryqqa shyǵady.
«Eshteńe de qupiia emes. Biz qansha BAQ bar ekenin, qaisysy qai salada jumys jasaitynyn jaqsy bilemiz. Biz de, sizder de bizdegi san jaǵynan kóp BAQ-tyń jartysy jumys istemeitinin nemese tek qaǵaz júzine ǵana bar ekenin bilemiz», - dedi sózin qorytyndylaǵan ministr.
Sondai-aq, ministr quryltaida media naryq qatysýshylarynyń jańa BAQ týraly zańda kórsetilgen redaktsiianyń menshik iesine táýeldiligi týraly máselesine qatysty usynystaryna da jaýap bere ketti.
«Biz usynystardy qabyldaýǵa daiynbyz. Oilanaiyq, sizder bizge redaktsiianyń menshik iesinen táýelsiz bolýy týraly oilaryńyzdy berińizder», - dedi ministr.
