QR Aqparat jáne qoǵamdyq damý ministri Dáýren Abaev QR Prezidenti Joldaýynyń bir aidaǵy negizgi nátijelerin baiandady, dep habarlaidy QazAqparat.
«Prezident Joldaýynyń jariialanǵanyna bir ai boldy, bul ýaqytta atqarylǵan jumys az emes. Atqaratyn sharýa da kóp. Munda Joldaýdyń belgili bir ýaqytqa josparlanǵan baǵdarlamalyq qujat ekenin túsiný qajet. Ony júzege asyrý úshin 81 tarmaqtan turatyn jalpyulttyq jospar ázirlendi jáne qabyldandy. Munda naqty sharalar kórsetilgen, onyń nátijesin halyq sezinedi dep úmittenem», - dedi ministr «Habar» arnasyndaǵy «Ashyq dialog» baǵdarlamasynda.
Mysal retinde ministr «Saryarqa» gaz qubyry qurylysynyń jandanǵanyn aitty.
«Memleket basshysy Nursultan Nazarbaevtyń bes áleýmettik bastamasyn júzege asyrýǵa kóńil bóldi. Eldi gazdandyrý boiynsha ol «Saryarqa» gaz qubyrynyń qurylysyn tezdetýdi tapsyrdy. Qazirgi ýaqytta Energetika ministrliginiń derekterine súiensek, kúnine shamamen 6 shaqyrym dánekerleý jumysy júrgizilýde. Toraptar qurylysy aiaqtalýǵa jaqyn, árine, alda tehnikalyq jumystar, jabdyqtaý máseleleri bar. Biraq barlyq jumysty jeltoqsan aiyna deiin bitirý josparlanǵan», - dep atap ótti D. Abaev.
Onyń aitýynsha, Qaraǵandy, Aqmola oblystarynda jáne Nur-Sultan qalasynda 3 millionǵa jýyq adam tabiǵi gazben qamtylady.
«Bul infraqurylym shaǵyn jáne orta biznestiń damýyna yqpal etedi. Jáne eń bastysy – aýaǵa lastaýshy zattardyń taralýyn tómendetedi», - dedi ministr.
.jpeg)