Aqparat jáne qoǵamdyq damý ministri Dáýren Abaev «Nur Otan» partiiasynyń respýblikalyq qoǵamdyq qabyldaýynda azamattarmen kezdesip, ótinishterin tyńdady, dep habarlaidy "Ult aqparat".
Azamattar jeke qabyldaýda da, onlain rejimde de ministrmen áńgimelesip, talap-tilekterin aitty. Ótinish sipattary ártúrli. Máselen, Qanat Erjigitov atty azamat «Dombyra» telearnasyn «Otaý TV» spýtnik jelisine qosýdy ótindi. Onyń aitýynsha, táýligine 24 saǵat boiy ulttyq mádenietti nasihattaityn telearna osy jyldyń basynda ashylǵan. Sonymen qatar, Janna Esenǵarina esimdi ótinish bildirýshi Qazaqstan televideniesin damytý týraly óz usynystaryn ortaǵa saldy. Shara Naqypova atty ótinish iesi «Rýhani jańǵyrý» baǵdarlamasy aiasynda «Birge» jobasyn damytý máselesin kóterdi.
Ótinish berýshilerdiń árbiriniń tilegin jiti tyńdaǵan ministr vedomstvo quzireti sheńberinde barlyǵyna shama-sharqynsha qoldaý kórsetiletinin aitty.
«Jalpy, memlekettik organdar basshylarynyń qabyldaý ótkizýi óte oryndy. «Nur Otan» partiiasynyń osy alańyn paidalanǵan óte durys dep oilaimyn. Keibir suraqtardyń bizdiń ministrlikke qatysy joq ekenin kórip otyrmyz. Azamattar bir máseleni túsinýi kerek: memlekettik júie jumys isteidi. Eger hat durys jazylyp, baǵyttalsa, oǵan mindetti túrde jaýap beriledi. Meniń oiymsha, qazir kelip jatqan adamdardyń kóbine jaýap berilip jatyr», - dedi Dáýren Abaev azamattardy qabyldaýdan keiin tilshilerdiń suraǵyna bergen jaýabynda.
.jpeg)