QR Aqparat jáne kommýnikatsiia ministri Dáýren Abaev Habar 24 arnasynda ótken onlain brifingte halyqty tótenshe jaǵdai kezinde barlyq talaptardy oryndaýǵa shaqyrdy. Ult portaly ministr málimdemesiniń tolyq mátinin oqyrman nazaryna usynady.
***
Qurmetti qazaqstandyqtar! Ózderińiz kórip otyrsyzdar, indet taralýy údep barady. Bir túnde 40-tan asa adamnyń anyqtalǵany – bul alańdatatyn jaǵdai. Qazir virýs juqtyrǵandardyń sany 204-ke jetti.
1899 adam statsionarlyq karantinde. 3 jarym myńnan astamy úi karantininde.
6 myńnan asa adam aýyrǵandarmen bailanysta bolǵan. Olardyń 95%-i anyqtaldy.
Qazir biz óte kúrdeli kezeńde turmyz. Virýs taralýyn baqylai almai qalý qaýpi týyndap otyr.
Ózge elderdegi jaǵdaiǵa qarańyzdar. Italiiada bir kúnde 969 adam qaitys bolǵan. Onyń barlyǵy - saqtyq sharasyna salǵyrt qaraǵannyń saldary. Bul jaǵdai barlyǵymyzǵa sabaq jáne eskertý bolýy kerek.
Koronavirýs, ásirese, jasy úlken adamdarǵa qaýipti. Olardyń ishinde bárimizdiń atamyz ben ájemiz, ákemiz ben anamyz bar. Ózimiz úshin qoryqpasaq ta, eń bolmasa, sol úlkenderimizdi oilaiyq.
Keibir adamda aýrý belgisi birden bilinbeýi múmkin. Ondai adam úide otyrmasa, ózi bilmei adamdarǵa juqtyrady.
Osylaisha, ondaǵan otbasynyń obalyna qalýyńyz múmkin. Osyndai jaǵdaidan saq bolaiyq.
Qazir virýsqa qarsy eń tiimdi kúres – ol karantin rejimin saqtaý. Sizderden osyny taǵy da suraimyz. Úiden shyqpańyzdar. Qazir, shetelge shyqpai-aq, aýrý juqtyrǵandardyń sany ósýde.
Bul degenimiz – aýrý kez-kelgen jerde juǵýy múmkin. Qonaqta, týystardyń úiinde, liftte, avtobýsta, kezekte turǵanda.
Alaida, kóp adamdardyń bul eskertýlerge salǵyrt qaraitynyn kórip otyrmyz.
Mysaly, keshe, bir kúnniń ózinde, tótenshe jaǵdai talaptaryn buzǵany úshin 237 adam jaýapqa tartylǵan. Onyń 74-i qamaýǵa alyndy.
Bul beiqamdyq aýrýhanada naýqastarǵa oryn jetpeýine ákelýi múmkin. Buǵan jol berýge bolmaidy. Sondyqtan, aǵaiyn, ózimizdi, jaqyndarymyzdy saqtaiyq.
Jumysty, kreditti, biznesti ýaiymdamańyzdar. Memleket eshkimdi tastamaidy. Kómektesedi.
Zeinetkerlerge dári aparýǵa, muqtaj jandarǵa azyq-túlik jetkizýge kómektesemiz. Buǵan deiin birneshe ret aitqanymyzdai, jumystan bosaǵan nemese aqy tólenbeitin demalysqa shyqqandar tólem alady.
Búgingi tańda, Úkimet áleýmettik mańyzy bar azyq-túlik satyp alýǵa rezervten 14,7 mlrd. teńge bóldi.
Oǵan qosa, dárigerlerge, politsiia qyzmetkerlerine jáne koronavirýspen kúresip jatqan adamdarǵa jeke qorǵanys quraldaryn satyp alý úshin 21,4 mlrd. teńge bólindi.
Sonymen birge, Nur-Sultan, Almaty, Shymkent qalalary men oblys ákimdikterine jeke qorǵanys quraldaryn, dári jáne meditsinalyq quraldar satyp alýǵa 10,7 mlrd. teńge qarastyrylǵan.
Qazir, salyq tekserýleri jáne ákimshilik quqyq buzýshylyqtar boiynsha isterdi qaraý toqtatyldy. Salyq deklaratsiiasyn tapsyrý merzimi 31 naýryzdan 30 sáýirge deiin uzartyldy.
Qurmetti aǵaiyn!
Memleket koronavirýspen kúreske qajetti barlyq sharany jasaidy. Biraq, birinshi kezekte, ár adam ózin-ózi, óz otbasyn saqtaýy kerek.
Sondyqtan, úide bolaiyq. Aman bolaiyq!
