QR Aqparat jáne kommýnikatsiialar ministri Dáýren Abaev «Habar» telearnasynyń «Ashyq dialog» baǵdarlamasynda mektep oqýshylarynyń hidjap kiiýine qatysy pikirin bildirdi, dep habarlaidy QazAqparat tilshisi.
Baǵdarlama barysynda onyń júrgizýshisi Túrkistan oblysyna qarasty aýyldardyń birindegi mektep oqýshylarynyń sabaqqa hidjab kiip kelýine jáne sonyń tóńireginde oryn alǵan shýǵa qatysty Dáýren Abaevtyń pikirin suraǵan bolatyn.
«Qazaqstanda «Bilim týraly» Zańǵa sáikes orta mektepterde mindetti mektep formasy engizilgen. Mektep formasyn saqtaý degenniń ózi qandai da bir atribýtikalardy nemese elementterdi, onyń ishinde dini de paidalanbaý degendi bildiredi. Iaǵni, zań sabaqqa tek qana hidjabpen nemese oramalmen ǵana emes, sonymen birge qandai da sýbmádeni sipattaǵy kiimmen barýǵa shekteý qoiady. Aýdan ákimshiligi men mektep basshylyǵy quqyqtyq aiasynda ǵana áreket jasaǵan. Meniń bilýimshe, ata-analarmen túsindirý jumystary júrgizilgen jáne oqýshylar mektepke hidjabpen barýlaryn toqtatqan», - dedi ministr baǵdarlama barysynda.
Sonymen qatar ol dini quqyqqa nuqsan kelýi týraly áńgimeniń bul oraida orynsyz ekendigin basa aitty.
«Birden bul máselege sońǵy núkte qoiaiyq. Sóz qandai da bir dindi kemsitý, oǵan qosa dini senimge nuqsan keltirý jaiynda bolyp otyrǵan joq. Bilim berý mekemesinen tysqary árkim qalaýynsha kiinýge erikti. Qazaqstanda dini nanym-senimge biregei ári óte qolaily ahýal qalyptasqan, menińshe, onymen eshkim de daýlasa almaidy. Konstitýtsiiaǵa sáikes memleketimiz zaiyrly sanalady. Bul sózdiń ózi memlekettiń dinnen bólek ekendigin bildiredi. Al mektep - bul eń aldymen memlekettik mekeme», - dedi Dáýren Abaev.
