QR Prezidenti Ákimshiligi basshysynyń birinshi orynbasary Dáýren Abaev Qazaqstannyń aýyl áielderiniń III forýmyna qatysýshylardy quttyqtap, erlermen qatar eleýli eńbek etip júrgen názik jandylardyń jumysyna sáttilik tiledi, dep habarlaidy QazAqparat.
Qazaqstannyń aýyl áielderiniń III forýmynda Dáýren Abaevtyń quttyqtaý hatyn QR Prezidenti janyndaǵy áielder isteri jáne otbasylyq demografiialyq saiasat jónindegi ulttyq komissiia tóraiymy Lázzat Ramazanova oqyp berdi.
«Qadirli hanymdar! Barshańyzdy Qazaqstannyń aýyl áielderiniń III forýmynyń ashylýymen shyn júrekten quttyqtaimyn. Aýyl men áiel – qai kezde de qazaq úshin qasterli de kieli uǵymdar. Bárimizdiń tamyrymyz aýyldan, ǵumyrymyz áielden bastalady. Qazir de el halqynyń 40 paiyzynyń astamy aýyldy jerde turady. Sondyqtan aýyldy damytý – memlekettik saiasattyń basty basymdyǵynyń biri. Bul rette áielderdiń áleýetin kúsheitýge árqashan mán beriledi. Sebebi ózderińizdiń ekonomikalyq úlesterińiz, áleýmettik jaýapkershilikterińiz jyldar saiyn artyp keledi», - deidi Dáýren Abaev.
Onyń aitýynsha, búgin de áielder óz kásipornyn ashyp, sharýa qojalyqtaryn basqaryp, biregei óndiristi iske qosyp, myńdaǵan adamdy jumyspen qamtamasyz etip otyr. Oǵan qosa óskeleń urpaqty tárbielep, otbasy qundylyqtaryn saqtaýda alatyn oryndary da erekshe mańyzdy.
«Sonymen qatar sizder bilim berý, densaýlyq saqtaý, biznes salasyn damytýǵa úlken úlesi qosyp kelesizder. Oǵan qosa «Jasyl ekonomikany», tsifrlyq tehnologiialar men innovatsiialyq jobalardyń damytý isinde de aýyl áielderiniń úlesi zor. Al Memleket basshysynyń bastamalary buǵan qosymsha serpin beredi. Mysaly Prezidentimiz biylǵy Joldaýynda áleýmettik mańyzy bar azyq-túlik taýarlarynyń ózindik tolyq qamtamasyz etý, milliondaǵan aýyl turǵyndarynyń tabysyn arttyrý, eńbek ónimderin eki ese arttyrý, agroónerkásip kesheni óniminiń eksporttyq kólemin eki ese arttyrý siiaqty tapsyrmalar berdi. Sizder de osy mindetterdi júzege asyrýǵa zor úles qosyp júrsizder. Aldaǵy ýaqytta da erlermen qatar eleýli eńbek etetinderińizge senimimiz zor», - dedi Dáýren Abaev.
