Dáýren Abaev qazaqstandyqtarǵa ýaqytsha tirkelýge beriletin ýaqytty qalai qysqartatynyn aitty, - dep habarlaidy "Ult aqparat".
"Qymbatty dostar, sońǵy kúnderi eń kóp talqylanǵan máseleniń biri azamattardy mindetti túrde ýaqytsha tirkeý normasy bolǵany belgili. Bul máseleniń qoǵamda qyzý talqylanyp, memorgandar tarapyna birqatar syn aitylýyna túsinistikpen qaraýǵa bolady. Ókinishke qarai, keibir qajetti sharalardyń der kezinde atqarylmaýy kórinis tapty. Árine, Zań qabyldanǵan soń, onyń júzege asýy shart. Endigi jerde basty mindetimiz - azamattardyń tirkeýden ótýine barynsha qolaily jaǵdai jasaý. Mine, osy maqsatta biz HQKO-lar qyzmetkerleriniń jumys kúnin uzarttyq. Buǵan qosa, olar azamattardy demalys kúnderinde de, iaǵni 7-8 qańtarda da qabyldady. Árine, atalǵan shara eńbek zańnamasy saqtala otyryp, júzege asyryldy", - dep jazdy ministr Facebook jelisindegi paraqshasynda.
Sonymen qatar, Dáýren Abaev operatsiia zaldarynda kóshi-qon politsiiasy qyzmetkerlerine arnalǵan jumys oryndarynyń kóbeitilip, HQKO qyzmetkerleriniń aýysym grafigine ózgertýlerdiń engizilgenin aitty. Onyń aitýynsha, 9 qańtardan bastap azamattardy jyljymaityn múlkiniń ornalasqan ornyna qaramastan tirkeý múmkindigi qarastyrylyp jatyr.
"Halyq tyǵyz ornalasqan Almaty men Shymkent qalalaryna mobildi HQKO-lar jiberildi. Olar áskeri bólimder men turǵyn sany kóp aýdandardy qyzmetpen qamtamasyz etýde. Tirkeýge qatysty barlyq suraqtaryńyzdyń jaýabyn Biryńǵai bailanys ortalyǵynyń 1414 nómiri arqyly alýlaryńyzǵa bolady. Árine, áli de birqatar máselelerdiń bar ekeni ras, olardy jaqyn ýaqytta retteý kózdelýde. Eń aldymen, shamamen bir ai ishinde "onlain" rejiminde tirkelý múmkindigi qoljetimdi bolmaq. Sonymen birge, azamattardan mindeti túrde 2-forma boiynsha (jyljymaityn múlikke quqyq týraly) anyqtamany talap etýdi alyp tastaý josparlanýda. Bul tirkelý protsesin 2 esege deiin azaitar edi", - dep jazdy ministr.
Sondai-aq, ol ministrliktiń HQKO-lardyń málimetter bazasyna ákimdikterdiń qoljetimdiligin qamtamasyz etýdi usynyp otyrǵanyn aitty. "Bul ákimdikte járdemaqy rásimdeýshi azamattardyń qajetti anyqtamalardy sol jerden alýyna múmkindik bermek. Osy qadam HQKO-lar júktemesin azaitatyny anyq. Sóz sońynda, biz azamattardy qalyptasqan jaǵdaiǵa túsinistikpen qaraýǵa shaqyramyz. Al, ministrlik óz tarapynan máselelerdiń rettelýine kúsh salatyn bolady", - dedi Aqparat jáne kommýnikatsiia ministri.
.jpeg)