«Ulyq Ulys - Altyn Orda: bastaýy, tarihy jáne murasy» atty halyqaralyq ǵylymi-tájiribelik konferentsiiaǵa qatysqan Prezident ákimshiligi jetekshisiniń birinshi orynbasary Dáýren Abaev Altyn Orda órkenieti din men ǵylymdy bir-birine qarsy qoimai damytqany týraly derekter keltirdi, dep habarlaidy "Ult aqparat".
«Altyn Ordada memlekettik basqarý men logistikanyń tiimdi júiesi qurylǵany tarihtan belgili. Sonyń biri – jámshik qyzmeti. Ol keiinnen birneshe ǵasyr boiy Reseide keńinen qoldanyldy. Sondai-aq «darýǵa» dep atalatyn azamattyq ákimshiliktiń júieli jumysy da osyǵan mysal bola alady», - dedi Prezident ákimshiliginiń ókili.
Sondai-aq, ol Altyn Orda imperiiasynda qalyptasqan ǵylym-bilim ǵurpy sońynda qalǵan memleketterge úlken mura qaldyrǵanyn aitty.
«Ózbek pen Jánibek handardyń bilik qurǵan ýaqytynda Altyn Ordaǵa kóptegen elden ǵalymdar aǵylyp kelip jatqany kópshilikke aian. Sonymen birge qanshama medreseler salynyp, ol jerde tek dini ilim emes, matematika, meditsina jáne basqa da ǵylymdar úiretilgen», - dedi Dáýren Abaev.
Onyń paiymynsha, qazir Eýraziia keńistigindegi elderdiń qoǵamdy uiystyrýǵa paidalanyp otyrǵan dialog mádenieti de sol kezeńnen mura bop jetken.
«Eýraziia kindiginde oryn tepken alyp imperiia – Altyn Ordanyń quramynda o bastan-aq tili, dini senimi men salt-dástúri ártúrli halyqtar ómir súrdi. Olardyń eki ǵasyr boiy bir memlekette birge tirshilik etýi dialog mádenietiniń, rýhani bailyqtyń jáne ózgege degen qurmettiń kórkem úlgisine ulasty.Etnosaralyq qatynastardy retteý, birtutas azamattyq ult qurý isiniń qazaqstandyq modelinen Altyn Ordalyq qaǵidatty kórýge bolady. Munda birlik – birkelkilik degendi bildirmeidi», - deidi Prezident ákimshiligi jetekshisiniń birinshi orynbasary.
