Almatydaǵy «Jahandaný dáýirindegi tsifrlyq kún tártibi» forýmy aiasynda QR Aqparat jáne kommýnikatsiialar ministri Dáýren Abaev birqatar sheteldik áriptesimen ekijaqty kezdesýler ótkizdi, dep habarlaidy "Ult aqparat" ministrliktiń baspasóz qyzmetine silteme jasap.
Belarýs Respýblikasynyń bailanys jáne aqparattandyrý ministri Sergei Popkovpen kezdesýde taraptar eki eldegi tsifrlandyrýdyń negizgi baǵyttary boiynsha salalyq vedomstvolardyń kelesidegi ózara yntymaqtastyǵyn talqylady. Budan tys, ministrler elektrondy qyzmetterdi, poshta bailanysyn, innovatsiialyq tehnologiialar parkterin damytý máselelerindegi pikirlerin bólisti.
Dáýren Abaev Ózbekstan Respýblikasy aqparattyq tehnologiialar jáne kommýnikatsiialardy damytý ministri Sherzod Shermatovpen kelissózder kezinde Ortalyq Aziiada ekonomikany tsifrlandyrý salasyndaǵy eki eldiń róli artyp kele jatqanyn aitty. D. Abaevtyń sózine qaraǵanda, innovatsiialyq ortalyqtardyń, AKT salasyndaǵy uiymdardyń, joǵary oqý oryndarynyń arasyndaǵy bailanystardyń nyǵaiýy transulttyq kompaniialar men investorlardy tartýǵa septigin tigizedi.
Kezdesý qorytyndylaryna orai, «Zerde» Ulttyq aqparattyq kommýnikatsiialyq holdingi (Qazaqstan) men «UZINFOCOM» memlekettik aqparattyq júielerdi qurý jáne qoldaý biryńǵai integratory (Ózbekstan) arasynda túsinistik memorandýmyna qol qoiyldy.
Sondai-aq, Dáýren Abaev Halyqaralyq elektr bailanysy odaǵynyń bas hatshysynyń orynbasary Malkolm Djonsondy qabyldady. Taraptar Qazaqstandaǵy joǵary oqý oryndarynyń ǵylymi áleýetin arttyrýǵa qatysty yntymaqtastyq jasaý múmkindikterin qarastyrdy.
Ázerbaijan Respýblikasynyń bailanys jáne joǵary tehnologiialar ministriniń orynbasary Elmir Velizademen kezdesýde AKT salasyndaǵy yntymaqtastyq týraly kelisimderge qol jetkizildi.
Aita keteiik, «Jahandaný dáýirindegi tsifrlyq kún tártibi» forýmy Memleket basshysy Nursultan Nazarbaevtyń bastamasymen uiymdastyryldy. Sharada innovatsiialardy jáne tehnologiialyq kásipkerlikti damytý máseleleri qozǵalyp, basty integratsiialyq jobalar, Eýraziialyq ekonomikalyq odaqta ónerkásipti tsifrlandyrý jáne aýyl sharýashylyǵynyń tsifrlyq transformatsiialanýy talqylandy.
