QR Aqparat jáne qoǵamdyq damý ministri Dáýren Abaev «Qazaqstannyń 100 jańa esimi» jobasy ne úshin kerektigin aitty, dep habarlaidy QazAqparat.
Vedomstvo basshysy «100 jańa esim» jobasy Táýelsizdik jyldarynda elimizge oń yqpalyn tigizgen azamattardy nasihattaý, olardyń eńbek tájiribesin tanystyrý maqsatynda uiymdastyrylǵanyn eske saldy.
«Osy joba arqyly túrli salada Qazaqstanda daryndy jastar bar ekenin kórsetkimiz keledi. Búginde olardyń tabysty tájiribesi kóptep kezdesedi. Ókinishke qarai, kúndelikti ómirdegi qarbalas jumystarmen osy adamdardy baiqamai júrýimiz múmkin. Sondyqtan bul adamdardyń tabysty eńbek tájiribesimen maqtan tutatynymyzdy kórsetkenimiz jón», - dedi D. Abaev elordada ótken baspasóz máslihatynda.
Osy oraida ministr «100 jańa esimge» laiyqty adamdar jaiynda kóbirek aitý artyq bolmaitynyn, osy adamdar qiyndyqty qalai eńsergeni barshaǵa úlgi ekenin jetkizdi.
«Osy adamdardyń ómir joly óskeleń úrpaqty yntalandyrýy kerek, iaǵni úlgi bolýy tiis. Bul turǵyda kópbalaly otbasylardan shyqqan balalar úshin úlgi bolatyny anyq. Óitkeni atalǵan jobaǵa qatysýshylardyń kóbisi kópbalaly otbasylardyń tárbiesinde boldy. Olar búginde túrli salada eleýli tabysqa jetip otyr», - dedi D. Abaev.
Budan burn habarlanǵandai, 2019 jyldyń 1 qazanynan bastap 100janaesim.ruh.kz saitynda «Qazaqstannyń 2019 jylǵy 100 jańa esimi: jas qazaqstandyqtardyń tabys tarihy» jobasyna ótinimder qabyldaý bastalady.
