Qazaqstan Jazýshylar odaǵy Nur-Sultan qalalyq filialynyń tóraǵasy Dáýletkerei Kápuly shetelden tarihi Otanyna kóship kelgen qandastardyń tap bolyp otyrǵan keibir máselege toqtaldy, dep habarlaidy QazAqparat.
«Aýyl» halyqtyq-demokratiialyq patriottyq partiiasynyń sailaýaldy tuǵyrnamasynda «Qandasym - qamalym» deitin tamasha, qyldan názik, jipten jińishke tus bar. Bul tus osy shetelden kóship kelip jatqan qandas baýyrlarymyzǵa qatysty. Áiteýir, Prezidenttiń Jarlyǵymen «qandas» dep bekitip aldyq. Sol qandastardyń sharýasymen «Aýyl» partiiasy ainalysyp jatsa quba-qup», - dedi ol «Aýyl» halyqtyq-demokratiialyq patriottyq partiiasynyń kezekten tys XVIII sezinde.
Osy rette Dáýletkerei Kápuly shetelden tarihi Otanyna kóship kelgen qandastarymyz tap bolyp otyrǵan keibir máselege toqtaldy.
«Bul - qujat máselesi. Qazaqstanǵa kóship kelgennen keiin óziniń qazaq ekenin dáleldeý úshin qujat aldyrý deitin soraqy dúnie bar. Bul mysaly Aýǵanstan qazaqtarynyń, Túrkiia qazaqtarynyń úlken problemasyna ainalǵan. Al Qytaidan kóship kelip jatqan qazaqtardyń sottalmaǵan deitin qujatyn azamattar «oibailap, aiǵailap» júrip aldyryp tastady. Iaǵni, kóship kelgen qazaqtardyń basyndaǵy basty problema - eń birinshi azamattyqqa ne bolmasa yqtiiar hat alýǵa tom-tom qaǵaz jinaý», - dedi Nur-Sultan qalalyq filialynyń tóraǵasy.
Sonymen qatar ol qandastarymyzǵa salynǵan úilerdiń sapasy syn kótermeitindigin de basa aitty.
«Óskemenniń qasynda «Nurly besik» deitin aýyl salyndy. Qanshama baýyrym, quda-jekjattarym, tamyr-tanystarym turady. Soǵan baryp kórdim. Qystygúni adam turǵysyz. Dál sol jaǵdai Soltústik Qazaqstannyń irgesindegi «Báiterek» aýylynda da qaitalanady. Ne bolmasa Kókshetaýdyń qasyndaǵy «Krasnyi iardaǵy» úilerdiń barlyǵy penoplastan salynǵan. Bul biliktiń kinási emes. Ony ortadaǵy jemqorlardyń jasap otyrǵan dúniesi ekendigin aitpasqa bolmaidy. Sondyqtan «Aýyl» partiiasy osyndai túitkildi máselelerdi biik minberden aita alatyndai kúnder bolyp jatsa, men sizderdiń ortalaryńyzda barmyn», - dedi Dáýletkerei Kápuly.
