Qazaqstandyq jas fýtbolshy Dastan Satpaev Angliiaǵa attanar aldynda týǵan-týysy men jaqyndarymen qoshtasty. Áleýmettik jelide taraǵan áserli videoda fýtbolshynyń týǵan jerimen, otbasy múshelerimen qoshtasý sáti kórsetilgen, dep habarlaidy ult.kz.
Kadrlardyń birinde Satpaevtyń kózine jas alǵanyn baiqaýǵa bolady.
Jeli qoldanýshylary bul sátti erekshe yqylaspen qabyldap, jas sportshyǵa jyly lebizderi men sáttilik tilekterin jaýdyrdy. Kópshilik onyń úlken arman jolyndaǵy mańyzdy qadamyna qoldaý bildirip, Angliiada tabysqa jetetinine senim bildirdi.
Eske salaiyq, Dastan Satpaev Almatynyń «Qairat» klýby sapyndaǵy sońǵy matchyn ótkizip, jankúierlerimen qoshtasqan bolatyn. Endi ol mansabyn Londonnyń «Chelsi» klýbynyń júiesinde jalǵastyryp, álemdik fýtboldaǵy jańa beleske qadam basty.
